Iqtisodiy tadqiqotlar va islohotlar markazi O‘zbekiston ko‘chmas mulk bozoridagi hozirgi vaziyatni tahlil qildi. Bu haqda markaz matbuot xizmati “Daryo”ga ma’lum qildi.
Tahlil natijalariga ko‘ra, ushbu sektorda fevral oyiga nisbatan bir oz pasayish kuzatilgan bo‘lsa-da, umumiy savdo hajmi deyarli bir xil darajada saqlanib qoldi. Shu bilan birga, narxlarning oshishiga qaramay, ko‘chmas mulk bozori faolligicha qolmoqda.
Joriy yil mart oyida O‘zbekistonda ko‘chmas mulk oldi-sotdi shartnomalari soni 20,3 ming donani tashkil etdi. Bu esa fevral oyiga (22 ming) nisbatan 7,6 foizga kamroqdir. 2021-yilning mos davriga (20,2 ming) nisbatan o‘sish 0,3 foizni tashkil etdi.
Ko‘chmas mulk oldi-sotdisi bo‘yicha rasmiylashtirilgan shartnomalar soni o‘zgarishi
Hududlar kesimida o‘sish sur’ati faqatgina Navoiy viloyatida (25 foiz) qayd etildi. Ko‘chmas mulk oldi-sotdi bitimlari sonining eng katta kamayishi Xorazm (24 foiz), Sirdaryo (20 foiz) va Namangan (19 foiz) viloyatlarida kuzatildi.
Tahlil natijalari Toshkent viloyati va Toshkent shahri ko‘chmas mulk bozorida talab mos ravishda 1 va 5,8 foiz kamayganini ko‘rsatmoqda.
Toshkent shahri va Toshkent viloyatida ko‘chmas mulk oldi-sotdisi bo‘yicha tuzilgan shartnomalar soni
Ikkilamchi uy-joy bozorida narxlar o‘zgarishi
Markaz hisob-kitoblariga ko‘ra, mart oyida ikkilamchi bozorda uy-joy o‘rtacha narxlari o‘tgan oyga nisbatan 1,9 foizga pasaygan (fevral oyida o‘sish 1,7 foizni tashkil etgan edi).
Hududlar kesimida turar-joy narxlarining eng yuqori o‘sish sur’atlari Surxondaryo (6 foiz), Toshkent shahri (2,4 foiz) kuzatilgan bo‘lsa, Sirdaryo (-11,6 foiz), Andijon (-7,6 foiz) va Namangan (-5,4 foiz) viloyatlarida narxlarning pasayishi qayd etildi.
Toshkent shahri va viloyat administrativ markazlarida ikkilamchi uy-joy bozoridagi narxlar o‘zgarishi (1 kv metr uchun AQSH dollari)
Ikkilamchi uy-joy bozoridagi narxlarning o‘zgarishi olx.uz saytida joylashtirilgan ma’lumotlar asosida hisob-kitob qilingan. Ma’lumotlar Web Scraping metodi orqali yig‘ilgan.
Mutaxassislarning ta’kidlashicha, davlatning uy-joy dasturlari ko‘chmas mulk bozorida taklif o‘sishini, shuningdek fuqarolarning uy-joy sotib olish qobiliyatini qo‘llab-quvvatlashda davom etmoqda.
Bundan tashqari, ipoteka foiz stavkalari 2022-yil oxirigacha o‘zgarishsiz qoladi. Moliya vazirligi tomonidan banklarga ajratilgan resurs mablag‘lari bo‘yicha stavkalar va ipoteka kreditlari bo‘yicha stavkalar (13 foiz) 2022 yil oxirigacha shu tarzda saqlanib qoladi.
Mart oyida Markaziy bank asosiy stavkani 17 foizgacha oshirganidan so‘ng, yangi kreditlar bo‘yicha foiz stavkalari oshishi kerak edi. Biroq davlat rahbari yil oxiriga qadar avvalgi stavkalarni saqlab qolish bo‘yicha topshiriq berdi.
Izoh (0)