Shavkat Mirziyoyevning tegishli qarori bilan Sherali Jo‘rayev “El-yurt hurmati” ordeni bilan mukofotlandi. Bu haqda Prezident matbuot xizmati xabar qildi.
“O‘zining noyob iste’dodi, ko‘p yillik samarali va betakror ijodi bilan o‘zbek qo‘shiqchilik san’atini va milliy madaniyatimizni rivojlantirish, uning shon-shuhratini dunyo xalqlari o‘rtasida keng targ‘ib etishga qo‘shgan beqiyos hissasi, mustaqilligimizning ma’naviy asoslarini mustahkamlash, xalqimiz, ayniqsa, yosh avlodimizni Vatanga muhabbat va sadoqat, milliy va umuminsoniy qadriyatlar ruhida tarbiyalash, yosh iste’dod egalarining qobiliyatini ro‘yobga chiqarish borasidagi katta xizmatlari, ijtimoiy hayotdagi va jamoat ishlaridagi faol ishtiroki hamda tavalludining 75 yilligi munosabati bilan O‘zbekiston xalq artisti, ‘Vatandoshlar’ jamoat fondining Vasiylik Kengashi raisi Sherali Jo‘rayev ‘El-yurt hurmati’ ordeni bilan mukofotlansin”, — deyiladi prezident farmonida.
Shuningdek, davlat rahbari Sherali Jo‘rayevni tug‘ilgan kuni munosabati bilan tabrik ham yo‘llagan. “El-yurtimiz sizni butun hayotini o‘zbek madaniyati va san’atini rivojlantirishga bag‘ishlagan, o‘z ijodiy maktabini yaratgan ulkan va betakror iste’dod egasi, fidoyi va millatparvar shaxs sifatida yaxshi biladi va yuksak qadrlaydi”, — deyiladi tabrikda.
Qayd etilishicha, Sherali Jo‘rayev 50 yildan ziyod ijodi davomida “O‘zbegim”, “Sohibqiron”, “Egasi bor yurt”, “Karvon”, “Sarbon”, “Inson qasidasi” kabi 600 ga yaqin qo‘shiq yaratgan. Uning “Birinchi muhabbatim”, “Yoshligimiz”, “Oy yuzingga”, “Oshiqlar sardori”, “Do‘st bo‘lsang, yonimda tur” kabi ashulalari xalq qo‘shiqlariga aylanib ketgan. Xonanda mumtoz shoirlar g‘azallarini kuyga solib, o‘zbek xalqi merosini yosh avlodga va jahonga tanitishga ulkan hissa qo‘shgan. Sherali Jo‘rayev 1981-yilda “O‘zbekistonda xizmat ko‘rsatgan artist”, 1987-yilda “O‘zbekiston xalq artisti” faxriy unvonlari, 2018-yilda “Fidokorona xizmatlari uchun” ordeniga sazovor bo‘lgan.
Avvalroq Sirdaryo viloyati hokimi G‘ofur Mirzayev “Xalq ta’limi homiysi” ko‘krak nishoni bilan taqdirlangandi. Shuningdek, prezident farmoni bilan Sergeli tumani 300-maktab direktori “O‘zbekiston Respublikasi xalq o‘qituvchisi” unvoni bilan mukofotlangan.
Mavzuga doir:
- Shavkat Mirziyoyev 14-yanvar — Vatan himoyachilari kuni munosabati bilan bir guruh harbiylarni mukofotladi
- Shavkat Mirziyoyev sog‘liqni saqlash sohasidagi bir guruh xodimlarni mukofotladi
- Shavkat Mirziyoyev Ichki ishlar organlari xodimlari kuni munosabati bilan bir guruh soha vakillarini mukofotladi
Izoh (0)