Namanganda tibbiyot xodimlari uchun spektakllarni bepul namoyish etish tajribasi yo‘lga qo‘yildi. Bu haqda “Daryo” muxbiri Azizbek Abduvaliyev xabar bermoqda.
Joriy yil 18-mart kuni prezidentning tibbiyot xodimlari bilan ochiq muloqoti davomida tibbiyot xodimlari uchun madaniy tadbirlar, jumladan, konsert va spektakllarni bepul namoyish etish zarurligi to‘g‘risida fikr bildirilgan edi.
Ushbu tashabbus birinchilardan bo‘lib Namanganda amalga oshirildi. Viloyat musiqali drama teatrida dramaturg Nurillo Abbosxon qalamiga mansub, rejissor Shuhrat Abdullayev tomonidan sahnalashtirilgan “Aziz” spektakli tibbiyot xodimlari uchun bepul namoyish etildi. Oila va qadriyatlar mavzusidagi spektakl tomoshabinlarga manzur bo‘ldi.
Viloyat sog‘liqni saqlash boshqarmasi mutasaddilarining ma’lum qilishicha, Namangandagi barcha shahar-tumanlarda viloyat musiqali drama teatri repertuaridagi spektakllarning tibbiyot xodimlari uchun bepul namoyishi davom etadi.
Izoh (0)