Шавкат Мирзиёевнинг тегишли қарори билан Шерали Жўраев «Эл-юрт ҳурмати» ордени билан мукофотланди. Бу ҳақда Президент матбуот хизмати хабар қилди.
«Ўзининг ноёб истеъдоди, кўп йиллик самарали ва бетакрор ижоди билан ўзбек қўшиқчилик санъатини ва миллий маданиятимизни ривожлантириш, унинг шон-шуҳратини дунё халқлари ўртасида кенг тарғиб этишга қўшган беқиёс ҳиссаси, мустақиллигимизнинг маънавий асосларини мустаҳкамлаш, халқимиз, айниқса, ёш авлодимизни Ватанга муҳаббат ва садоқат, миллий ва умуминсоний қадриятлар руҳида тарбиялаш, ёш истеъдод эгаларининг қобилиятини рўёбга чиқариш борасидаги катта хизматлари, ижтимоий ҳаётдаги ва жамоат ишларидаги фаол иштироки ҳамда таваллудининг 75 йиллиги муносабати билан Ўзбекистон халқ артисти, ‘Ватандошлар’ жамоат фондининг Васийлик Кенгаши раиси Шерали Жўраев ‘Эл-юрт ҳурмати’ ордени билан мукофотлансин», — дейилади президент фармонида.
Шунингдек, давлат раҳбари Шерали Жўраевни туғилган куни муносабати билан табрик ҳам йўллаган. «Эл-юртимиз сизни бутун ҳаётини ўзбек маданияти ва санъатини ривожлантиришга бағишлаган, ўз ижодий мактабини яратган улкан ва бетакрор истеъдод эгаси, фидойи ва миллатпарвар шахс сифатида яхши билади ва юксак қадрлайди», — дейилади табрикда.
Қайд этилишича, Шерали Жўраев 50 йилдан зиёд ижоди давомида «Ўзбегим», «Соҳибқирон», «Эгаси бор юрт», «Карвон», «Сарбон», «Инсон қасидаси» каби 600 га яқин қўшиқ яратган. Унинг «Биринчи муҳаббатим», «Ёшлигимиз», «Ой юзингга», «Ошиқлар сардори», «Дўст бўлсанг, ёнимда тур» каби ашулалари халқ қўшиқларига айланиб кетган. Хонанда мумтоз шоирлар ғазалларини куйга солиб, ўзбек халқи меросини ёш авлодга ва жаҳонга танитишга улкан ҳисса қўшган. Шерали Жўраев 1981 йилда «Ўзбекистонда хизмат кўрсатган артист», 1987 йилда «Ўзбекистон халқ артисти» фахрий унвонлари, 2018 йилда «Фидокорона хизматлари учун» орденига сазовор бўлган.
Аввалроқ Сирдарё вилояти ҳокими Ғофур Мирзаев «Халқ таълими ҳомийси» кўкрак нишони билан тақдирланганди. Шунингдек, президент фармони билан Сергели тумани 300-мактаб директори «Ўзбекистон Республикаси халқ ўқитувчиси» унвони билан мукофотланган.
Изоҳ (0)