12-aprel kuni Senatning sud-huquq masalalari va korrupsiyaga qarshi kurashish qo‘mitasi ekspertlar guruhi majlisida “Ko‘p kvartirali uylarni boshqarish tizimi takomillashtirilishi munosabati bilan O‘zbekistonning ayrim qonun hujjatlariga o‘zgartish va qo‘shimchalar kiritish to‘g‘risida”gi qonun muhokama qilindi.
Qo‘mita ekspertlari ta’kidlashicha, so‘nggi besh yil davomida jami 37 mingdan ortiq ko‘p kvartirali uylardan foydalanishning texnik xavfsizlik qoidalariga rioya etilishini o‘rganish natijalari bo‘yicha 61 mingdan ortiq holatda ko‘chmas mulk egalari tomonidan uy-joy fondi va unga tutash hududlarda o‘zboshimchalik bilan qurilmalar barpo etilganligi aniqlangan. Ularni bartaraf etish yuzasidan majburiy ko‘rsatmalar berilgan.
Biroq o‘zboshimchalik bilan barpo etilgan noqonuniy qurilmalarni majburiy tartibda bartaraf etishga oid sudlarga arizalar taqdim etishda oldindan davlat boji to‘lovini amalga oshirish belgilanganligi tufayli ushbu mazmundagi materiallarni sudlarga taqdim etishda bir qator qiyinchiliklarga duch kelinmoqda.
Ta’kidlanishicha, amaldagi qonunchilikda uy-joy mulkdorlari shirkatlari ko‘p kvartirali uyga tutash yer uchastkasini obodonlashtirish bo‘yicha hamda aholiga boshqa xizmatlar ko‘rsatilgan va ishlar bajarilgan taqdirda xizmatlar ko‘rsatish uchun tegishli soliq to‘lovlaridan ozod etilgan. Ammo ushbu imtiyoz boshqaruv tashkilotlari faoliyatiga nisbatan tatbiq etilmayotganligi turli kelishmovchiliklarni yuzaga keltirishi mumkinligi qayd etildi.
Ushbu bo‘shliqlarni bartaraf etish maqsadida ishlab chiqilgan va muhokama qilinayotgan ushbu qonun bilan Ma’muriy javobgarlik to‘g‘risidagi kodeksga, Soliq kodeksiga hamda “Davlat boji to‘g‘risida”gi qonunga tegishli o‘zgartish va qo‘shimchalar kiritilmoqda.
Majlis ishtirokchilarining qayd etishicha, qonunga kiritilayotgan o‘zgartirishlar boshqaruv organlarining moliyaviy barqarorligini ta’minlash, ko‘p kvartirali uylarni boshqarish tizimida raqobat muhitini yaratish, aholiga sifatli servis xizmatlari ko‘rsatishning yangi bosqichlarini amaliyotga tatbiq etish, uy-joy fondlarini saqlash borasida ko‘chmas mulk egalari tomonidan bildirilayotgan ko‘plab e’tirozlarning oldi olishga xizmat qiladi.
Senat matbuot xizmati xabarida aytilishicha, majlis yakunida ekspertlarning ushbu qonun bo‘yicha tavsiyalari tayyorlanib, sud-huquq masalalar va korrupsiyaga qarshi kurashish qo‘mitasiga taqdim etildi.
Izoh (0)