Qashqadaryo viloyatining Mirishkor tumani hokimi Sherali Sanayev avvalroq 50 ming dollar pora bilan qo‘lga tushgan o‘rinbosari haqida gapirib, undan bu ishni kutmaganini, sababi o‘rinbosari avval ishonchli sohada ishlaganini aytdi. Bu haqda “Daryo”ga hokimning matbuot kotibi Azizbek Yazdurdiyev xabar berdi.
Azizbek Yazdurdiyevning ma’lumot berishicha, bugun Qarshi shahridagi Jurnalistlar uyida Mirishkor tumani hokimi Sherali Sanayev ishtirokida jurnalist va blogerlar uchun matbuot anjumani tashkil etilgan. Unda so‘z olgan OAV vakillari Sherali Sanayevga yuzlanib, 50 ming dollar pora bilan qo‘lga tushgan o‘rinbosari haqida so‘ragan.
“Huquq tartibot organlari bu bo‘yicha tergov yakuniga ko‘ra ma’lumot beradi, albatta. Meni fikrimga kelsak, o‘rinbosarim avvaldan ishonchli sohada ishlagani uchun unga ishonganmiz, lekin bunaqa ish bo‘lishini hecham kutmaganmiz. Shu voqea yuz berganida ham bu voqea haqida o‘z munosabatimni bildirgandim. Holat tizimimizni nazoratga olishimiz kerakligini eslatdi”, — degan tuman hokimi.
Eslatib o‘tamiz, Sherali Sanayevning sobiq o‘rinbosari, o‘rinbosarlikka qadar viloyat IIB boshlig‘i o‘rinbosari sifatida ishlagan va 2021-yilning sentabr oyidan 2022-yilning fevral oyiga qadar Mirishkor tumani Mahalla va oilani qo‘llab-quvvatlash bo‘limi boshlig‘i lavozimida ishlagan U.Ya. fuqaroga yer olib berishni va’da qilib, 80 ming dollar so‘ragan. 2022-yilning 5-fevral kuni esa so‘ralgan pulning 50 ming dollarini olayotgan paytida qo‘lga tushgan. Keyinroq Muborak tuman IIB boshlig‘i X.B. ham hokim o‘rinbosariga sheriklikda gumonlanib, qamoqqa olingani xabar berilgandi. Hokim o‘rinbosari va tuman IIB boshlig‘ining xatti-harakati bo‘yicha qo‘shimcha ma’lumotlar berilmagan.
Izoh (0)