Fransiya prezidenti Emmanuel Makron, agar Ukrainadagi vaziyatni hal qilishda foydali bo‘lsa, Kiyev yoki Ukrainaning boshqa shahriga tashrif buyurishga tayyorligini ma’lum qildi. Bu haqda BFMTV xabar bermoqda.
“Men Kiyevga yoki Ukrainaning istalgan boshqa shahriga borishga tayyorman, lekin buni shunchaki elchixonaga tashrif uchun qilmayman. Agar ushbu tashrif mavjud vaziyatda qandaydir natijalarga olib kelsa, foydali bo‘lsa, uni amalga oshiraman”, — dedi u.
Makronning so‘zlariga ko‘ra, agar uning tashrifi Ukraina prezidenti Vladimir Zelenskiy va Rossiya prezidenti Vladimir Putin o‘rtasidagi muloqotga imkon bersa, u mazkur qadamni qo‘yishga tayyor.
O‘tgan hafta bir necha yevropalik siyosatchilar Kiyevga tashrif buyurdi. Xususan, 8-aprel kuni Yevropa diplomatiyasi rahbari Jozep Borrel Ukrainaga keldi. U bilan birga Yevropa komissiyasi rahbari Ursula fon der Lyayen mamlakatga tashrif buyurdi.
Borrel Ukrainadagi jangovar harakatlar tugashini tilab, “bu urushda jang maydonida g‘alaba qozonish kerak”, deb ta’kidladi. U Bryussel Kiyevga qurol sotib olish uchun qo‘shimcha 500 million yevro ajratganini qayd etdi.
Borrelning so‘zlarini Rossiya TIV rasmiy vakili Mariya Zaxarova tanqid qildi. Telegram’da u Yevropa Ittifoqi iqtisodiy tashkilotdan “NATOning iqtisodiy aloqalar bo‘limi”ga aylangani haqida yozdi.
Ursula fon der Lyayen esa Zelenskiyga mamlakatga Yevropa Ittifoqiga qo‘shilish uchun nomzod maqomini berishda majburiy bo‘lgan so‘rovnomani topshirdi. Uning ta’kidlashicha, YI Ukrainaning a’zolik arizasini shu yilning yozida ko‘rib chiqishni rejalashtirmoqda.
9-aprel kuni Kiyevga Buyuk Britaniya bosh vaziri Boris Jonson tashrif buyurdi. U Zelenskiy bilan uchrashib, mamlakatga 120 ta zirhli texnika va kemalarga qarshi tizimlar ko‘rinishidagi harbiy yordam hamda Jahon bankidan qo‘shimcha 500 million dollar kredit kafolati berishni va’da qildi. Shuningdek, Britaniya bosh vaziri Rossiya bosqini tugagandan keyin Kiyev va Kiyev viloyatini tiklashda yordam berishga tayyorligini bildirdi.
Shu kuni Avstriya kansleri Karl Nexammer ham Zelenskiy bilan muzokaralar o‘tkazish uchun Kiyevga keldi, so‘ng Kiyev viloyatining Bucha shahriga tashrif buyurdi. Avstriyada uning safari tanqid qilindi, deb yozadi Kronen Zeitung, chunki Ukraina bilan birdamlik namoyishi mamlakatning neytral siyosatini shubha ostiga qo‘ygan.
11-aprel kuni Nexammer Moskvaga tashrif buyurdi va Putin bilan muzokaralar o‘tkazdi. Kreml matbuot kotibi Dmitriy Peskov ularning uchrashuvi qisqa bo‘lganini aytdi. Nexammer Rossiya prezidenti bilan “juda qattiq va ochiq suhbat” o‘tkazganini ta’kidladi.
Izoh (0)