Pokiston parlamenti Shahboz Sharifni mamlakatning yangi bosh vaziri etib sayladi, deb yozmoqda Reuters.
Pokiston musulmon ligasi (PML-N) partiyasining rahbari Shahboz Sharif mamlakat Milliy assambleyasida (parlament quyi palatasi) ovoz berish orqali saylandi. Muxolifatchi blok nomzodini yoqlab 174 nafar deputat ovoz berdi. U Pokiston tarixidagi 23-bosh vazir bo‘ldi.
70 yoshli Shahboz Sharif 2018-yilda Imron Xon hokimiyat tepasiga kelguniga qadar Pokistonning aholi eng zich joylashgan Panjob viloyatida bosh vazir lavozimida ishlagan.
Bosh vazirlik uchun yana bir nomzod, Pokistonning amaldagi tashqi ishlar vaziri Shoh Mahmud Qureyshining ma’lum qilishicha, sobiq bosh vazir Imron Xon boshchiligidagi “Adolat harakati” (Tehrik-e-Insaf) partiyasi parlamentdagi ovoz berishni boykot qilgan va ish tashlash e’lon qilgan. Xon va uning partiyasidagi deputatlarning aksariyati saylovdan oldin iste’foga chiqqan.
Saylangandan keyingi nutqida Sharif Xonning iste’foga chiqqan hukumatini iqtisodni noto‘g‘ri boshqarishda aybladi va hammasini qayta yo‘lga qo‘yish yangi hukumat uchun katta muammo bo‘lishini aytdi.
Imron Xon o‘zining bosh vazirlikdan chetlatilishida hamon xorijning aralashuvini ayblamoqda. Uning so‘zlariga ko‘ra, Afg‘oniston, Rossiya va Xitoy bo‘yicha tashqi siyosatdagi pozitsiyalari tufayli uning raqiblari AQSH bilan til biriktirgan. Vashington, o‘z navbatida, bu ayblovlarni qat’iyan rad etdi.
Avvalroq Pokistonda sobiq bosh vazir Imron Xon va uning Tehrik-i-Insaf partiyasining o‘n minglab tarafdorlari hukumat almashinuviga qarshi ommaviy norozilik namoyishlariga chiqqandi.
Izoh (0)