Avstriya kansleri Karl Nexammer Rossiya prezidenti Vladimir Putin bilan Novo-Ogaryovadagi muzokaralarini “juda ham to‘g‘ridan to‘g‘ri, ochiq va qattiq” deya atab, bu “do‘stona tashrif bo‘lmaganini” ta’kidladi. Bu haqda Avstriyaning Kronen Zeitung gazetasi Nexammer kanselyariyasiga tayanib, xabar berdi.
Uchrashuv davomida kansler Ukrainadagi harbiy jinoyatlar mavzusini ko‘tarib, aybdorlar jazolanishi zarurligini qayd etgan. Nexammer, shuningdek, “Ukrainada odamlar o‘lishni davom etar ekan”, Rossiyaga qarshi sanksiyalar o‘z kuchida qolishi va tobora kuchaytirilishini ma’lum qilgan.
“Lekin Putinga aytgan eng muhim gapim shunda ediki, urush oxir-oqibat yakunlanishi kerak, chunki urushda har ikki tomon ham mag‘lub bo‘ladi”, — deydi u.
Endilikda Vena Putin bilan muzokaralari haqida Yevropadagi sheriklarini xabardor qiladi. Rossiya tomoni uchrashuvga hozircha izoh bermagan.
Putin va Nexammer o‘rtasidagi muzokaralar 11-aprel kuni kechqurun bo‘lib o‘tdi. Avstriya OAVlarining ma’lumotlariga ko‘ra, uchrashuv 1,5 soatga davom etgan, suhbatning o‘zi — 75 daqiqa. Muzokaralar matbuot rejimi uchun yopiq eshiklar ortida o‘tgan, boshlanishidan oldin protokol uchun suratga olishlar ham, yakunda matbuot anjumani ham bo‘lmagan
Nexammer Rossiya Ukrainaga hujum boshlagandan beri Putin bilan shaxsan uchrashgan birinchi yevropalik yetakchi bo‘ldi.
Izoh (0)