Mart oyida yangi avtomobillar sotuvi biroz oshdi. Bu haqda Iqtisodiy tadqiqotlar va islohotlar markazi “Daryo”ga ma’lum qildi.
Mart oyida 112,1 ming dona avtotransport vositalari davlat ro‘yxatidan o‘tkazildi va bu o‘tgan yilning mart oyiga (55,5 ming) nisbatan 2 barobarga ko‘proqdir.
Shu bilan birga, joriy yilning fevral oyiga nisbatan 12,7 foizga pasayish kuzatildi. 2020-yilning mart oyiga qaraganda o‘sish ko‘rsatkichi qariyb 3 barobarga yetdi.
O‘tgan yanvar—fevral oylaridagi kabi avtomashinalarni ro‘yxatga olishning ko‘payishi avtomobillarni xarid qilish uchun to‘lovlarning bekor qilinishi bilan bog‘liq.
O‘zbekistonga avtotransport vositalarini sotib olish yoki vaqtincha olib kirish uchun yig‘imlar bekor qilingan.
1-yanvardan boshlab ikkilamchi bozordan sotib olingan avtomobillarni davlat ro‘yxatidan o‘tkazish narxi pasaytirildi va ushbu o‘zgarishlarning ta’siri mart oyida ham davom etdi.
Ikkilamchi bozor
2021-yilda ikkilamchi bozorda bir oyda o‘rtacha 40 ming dona avtomobillar sotilgan bo‘lsa, joriy yil mart oyida ushbu ko‘rsatkich 84,7 mingni tashkil etdi. Bu ko‘rsatkich yanvar oyida 85,3 mingga, fevral oyida 101 mingga yetgan edi.
Birlamchi bozor
Birlamchi bozordan xarid qilingan avtomobillar soni 27,5 ming donani tashkil etib, fevral oyiga (27,4 ming) nisbatan 0,3 foizga o‘sdi. 2021 yilning martiga (18,2 ming) nisbatan esa 51 foizga oshdi.
Fevral oyi bilan taqqoslaganda yangi avtomobillar savdosida sezilarli darajada o‘sish Farg‘ona (43 foiz), Namangan (23 foiz), Jizzax (20 foiz) viloyatlarida kuzatildi.
Shu bilan birga, Qashqadaryo (-31 foiz), Samarqand (-13 foiz), Toshkent (-16 foiz), Navoiy (-7 foiz) va Andijon (-5 foiz) viloyatlarida pasayish qayd etildi.
Avvalroq O‘zbekistonda yil boshidan beri ishbilarmonlik faoliyati qanday bo‘lgani haqida xabar berilgan edi.
Izoh (0)