Buxoro shahrida 11 kishiga xonadon ajratib berishni va’da qilib, ularni chuv tushirgan MCHJ rahbariga nisbatan jinoyat ishi qo‘zg‘atildi, deb xabar beradi Bosh prokuratura huzuridagi departament.
Ma’lum qilinishicha, departamentning Buxoro shahar bo‘limi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazilgan. Tekshiruv davomida “I.C.” MCHJ mas’ul shaxslari Hamza ko‘chasidagi ikki qavatli uyni o‘zboshimchalik bilan buzib, ushbu uyda istiqomat qiluvchi 11 nafar fuqaroni aldab, ularga ushbu uy o‘rnida quriladigan 7 qavatli uydan xonadon ajratib berishni va’da qilgani aniqlangan.
Ular fuqarolardan jami 563,9 million so‘m naqd pulni firibgarlik yo‘li bilan qo‘lga kiritib, mablag‘lar hisobidan Spark, Malibu va Captiva rusumli avtotransport vositalarini xarid qilib, jinoiy yo‘l bilan topilgan daromadlarini legallashtirgan. Shuningdek, ular MCHJning tovar aylanmasini kamaytirib ko‘rsatish orqali 408,7 million so‘m soliq va boshqa majburiy to‘lovlarni to‘lashdan bo‘yin tovlab kelgan.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Farg‘onada suv idorasi rahbari va boshqa mansabdor shaxslar 720 mln so‘mdan ortiq mablag‘ni talon-toroj qilgani aniqlangani, Olmaliqda qariyb 220 mln so‘mlik nasos agregatorlarini o‘zlashtirgan korxona rahbari ushlangani to‘g‘risida xabar berilgandi.
Izoh (0)