Qashqadaryoda Davlat soliq qo‘mitasining quyi organlari tomonidan fuqarolarning qo‘l telefonlariga dag‘dag‘ali SMS xabarnomalar yuborilayotgani aytilmoqda. Bu haqda “Daryo”ga viloyatda faoliyat yurituvchi jurnalistlar ma’lum qilgan.
“Davlat soliq qo‘mitasining ayrim quyi organlari odamlarning qo‘l telefoniga Soliq:75-5226363: Hurmatli fuqaro sizning xonadoningizga hisoblangan soliq qarzdorligi sudga kiritilmoqda. Shahrisabz t DSI (yuboruvchi raqam: 97. 406 17 17), deb yozilgan mavhum xabarnoma yuborib, o‘tirgan joyidan bechora soliq to‘lovchilarga dag‘dag‘a qilmoqda. Sizda qaysi xonadon, qachongi soliq, qancha summa, to‘lov muddati qachon tugagan, sudga kiritilishiga asos qani, degan savollar tug‘ilsa, javob olish uchun SMS’da ko‘rsatilgan telefon raqamiga qo‘ng‘iroq qilishingiz foydasiz”, — deydi bu haqda “Daryo” muxbiri bilan suhbatlashgan jurnalist Kamoliddin Karimov.Kamoliddin Karimov tuman Soliq inspeksiyasining bu harakatini “Jismoniy shaxslar 15-aprelga qadar 2022-yil uchun hisoblangan soliqning yarmini to‘lashlari kerak. Hammasi ana shu bo‘yicha rejadan chiqmay qolishning oldini olishga qaratilgan antiqa harakatlar xolos”, — deydi.
Soliq inspeksiyasining ogohlantiruvchi sms‘lari haqida gapirgan yana bir suhbatdosh, jurnalist Sarvinoz Ismoilova “Sizni sudga bermiz”, deb yozilgan dag‘dag‘ali SMS xabarnoma uning onasi sog‘lig‘i yomonlashuvchiga sabab bo‘lganini aytmoqda.
“O‘tgan kuni ayamga shunaqa SMS kelgan ekan. Bo‘rttirish emas-u, buni o‘qigan ayamning qon bosimlari chiqib ketdi. Bu nimasi? Nimaga buncha vahima deb mendan so‘radilar. Ayam ham hayron soliqqa ham shunaqa SMS yozadimi deb”, — deydi Sarvinoz Ismoilova.
Mazkur holatga izoh bergan viloyat Soliq boshqarmasi axborot xizmati xodimi Zarif Keldiyorov “Haqiqatan ham 2022-yilning 9-aprel kuni Shahrisabz tumani davlat Soliq inspeksiyasi mas’ul xodimi tomonidan fuqarolar xonadoniga hisoblangan soliq qarzdorligi sudga kiritilayotgani qayd etilgan sms-xabarnoma jo‘natilgan. Bu xabar matni 2021-yilning oktabr oyida tayyorlangan bo‘lib, soliq qarzi mavjud fuqarolarga ogohlantirish sifatida jo‘natilgan. Mas’ul xodimning ehtiyotsizlik va anglashilmovchilik tufayli mazkur SMS’lar Shahrisabz tumani davlat soliq inspeksiyasi bazasidan 700 nafar ortiq fuqarolarga qayta yuborilgan. Aslida to‘lov muddati yaqinlashayotgani yuzasidan eslatma xabar jo‘natilishi kerak bo‘lgan. Ehtiyotsizlikka yo‘l qo‘ygan mas’ul xodimga nisbatan xizmat tekshiruvi olib boriladi va tegishli tartibda jazoga tortiladi”, — dedi.
Viloyat soliq boshqarmasi mas’uli shu o‘rinda qashqadaryoliklarga murojaat qilib, Soliq kodeksining 423- va 440-moddalariga asosan jismoniy shaxslarning mol-mulk va yer solig‘ini to‘lash muddati 15-aprel va 15-oktabrga qadar teng ulushlarda amalga oshirilishi lozimligini eslatgan.
“Soliqlarni hududiy davlat soliq inspeksiyalariga borgan holda yoki elektron tarzda mobil ilovalar orqali to‘lashingiz mumkin. Unutmang, soliqlar mahalliy budjet daromadlarini to‘ldirib, yashab turgan hududlarimizning rivoji, taraqqiyoti uchun sarflanadi. Soliqlar belgilangan muddatlarda to‘lanmagan taqdirda, har bir kechiktirilgan kun uchun O‘zbekiston Respublikasi Markaziy bankining amalda bo‘lgan qayta moliyalash stavkasining uch yuzdan bir baravari miqdorida penya hisoblanishiga sabab bo‘ladi”, — deydi Zarif Keldiyorov.
Izoh (0)