Ijtimoiy tarmoqlarda Mercedes-Benz E 200 avtomobili haydovchisi yo‘lning qatnov qismida xavfli holatni yuzaga keltirgan holda drift qilgani aks etgan videolavha tarqaldi. Toshkent shahar Ichki ishlar bosh boshqarmasi holat bo‘yicha ma’lumot berdi.
Aniqlanishicha, qoidabuzarlik 26-mart kuni Olmazor tumani, Talabalar ko‘chasida mashinani ishonchnoma asosida boshqargan 24 yoshli X.M. tomonidan sodir etilgan.
Holat yuzasidan fuqaro X.M.ga nisbatan Toshkent shahar IIBB YHXB xodimlari tomonidan ma’muriy bayonnoma rasmiylashtirilgan.
Ma’lumot uchun, Ma’muriy javobgarlik to‘g‘risidagi kodeksning 128-5-moddasi (transport vositalari haydovchilarining xalaqit berishi yoki avariya holatini yuzaga keltirishi, yo‘lning qarama-qarshi harakatlanish uchun mo‘ljallangan tomoniga yoki bo‘lagiga chiqishi) 2-qismiga muvofiq bunday qoidabuzarlik BHMning 10 baravari (2,7 million so‘m) miqdorida jarima solishga sabab bo‘ladi.
Eslatib o‘tamiz, poytaxtda 2022-yilning yanvarida ham shunday holat yuz bergandi. Chilonzorda Mercedes-Benz E 200 avtomobili haydovchisi yo‘lning qatnov qismida xavfli holatni yuzaga keltirgan holda drift qilgandi.
Izoh (0)