Март ойида янги автомобиллар сотуви бироз ошди. Бу ҳақда Иқтисодий тадқиқотлар ва ислоҳотлар маркази «Дарё»га маълум қилди.
Март ойида 112,1 минг дона автотранспорт воситалари давлат рўйхатидан ўтказилди ва бу ўтган йилнинг март ойига (55,5 минг) нисбатан 2 баробарга кўпроқдир.
Шу билан бирга, жорий йилнинг февраль ойига нисбатан 12,7 фоизга пасайиш кузатилди. 2020 йилнинг март ойига қараганда ўсиш кўрсаткичи қарийб 3 баробарга етди.
Ўтган январь—февраль ойларидаги каби автомашиналарни рўйхатга олишнинг кўпайиши автомобилларни харид қилиш учун тўловларнинг бекор қилиниши билан боғлиқ.
Ўзбекистонга автотранспорт воситаларини сотиб олиш ёки вақтинча олиб кириш учун йиғимлар бекор қилинган.
1 январдан бошлаб иккиламчи бозордан сотиб олинган автомобилларни давлат рўйхатидан ўтказиш нархи пасайтирилди ва ушбу ўзгаришларнинг таъсири март ойида ҳам давом этди.
Иккиламчи бозор
2021 йилда иккиламчи бозорда бир ойда ўртача 40 минг дона автомобиллар сотилган бўлса, жорий йил март ойида ушбу кўрсаткич 84,7 мингни ташкил этди. Бу кўрсаткич январь ойида 85,3 мингга, февраль ойида 101 мингга етган эди.
Бирламчи бозор
Бирламчи бозордан харид қилинган автомобиллар сони 27,5 минг донани ташкил этиб, февраль ойига (27,4 минг) нисбатан 0,3 фоизга ўсди. 2021 йилнинг мартига (18,2 минг) нисбатан эса 51 фоизга ошди.
Февраль ойи билан таққослаганда янги автомобиллар савдосида сезиларли даражада ўсиш Фарғона (43 фоиз), Наманган (23 фоиз), Жиззах (20 фоиз) вилоятларида кузатилди.
Шу билан бирга, Қашқадарё (-31 фоиз), Самарқанд (-13 фоиз), Тошкент (-16 фоиз), Навоий (-7 фоиз) ва Андижон (-5 фоиз) вилоятларида пасайиш қайд этилди.
Аввалроқ Ўзбекистонда йил бошидан бери ишбилармонлик фаолияти қандай бўлгани ҳақида хабар берилган эди.
Изоҳ (0)