Birlashgan Millatlar Tashkilotiga a’zo davlatlarning aksariyati Rossiyaning Inson huquqlari bo‘yicha kengashi tarkibidan chiqarilishini qo‘llab-quvvatladi. BMT Bosh Assambleyasida 93 davlat ushbu qarorni yoqlab, 24 davlat, jumladan O‘zbekiston qarshi ovoz berdi, yana 58 davlat betaraf qoldi.
Ukrainaning Bucha shahrida tinch aholi o‘ldirilgani ma’lum bo‘lgach, AQSh va Buyuk Britaniya Rossiyani Inson huquqlari kengashidan chiqarishni talab qildi. Rossiya hukumati Buchadagi odamlarning o‘limiga aloqadorligini rad etmoqda.
Rossiya Inson huquqlari bo‘yicha kengashdagi vakolat muddati tugaguniga qadar ovoz berish huquqidan mahrum bo‘ladi, biroq yig‘ilishlarda qatnasha oladi, deya aniqlik kiritdi “TASS”.
Keyinroq “RIA Novosti” Rossiyaning BMTdagi doimiy vakili o‘rinbosariga tayanib xabar berishicha, Rossiya BMT Inson huquqlari bo‘yicha kengashdagi vakolatlarini muddatidan oldin tugatishga qaror qilgan. Rossiya BMT Bosh Assambleyasi rezolyutsiyasini “noqonuniy va siyosiy motivga ega qadam” deb hisoblamoqda.
Ma’lumot uchun Inson huquqlari bo‘yicha kengash a’zolari hududiy asosda uch yil muddatga saylanadi. Rossiya va Ukraina Sharqiy Yevropa davlatlaridan 2021-yildan 2023-yilgacha bo‘lgan muddatga saylangandi.
15-mart kuni Yevropa Kengashi Parlament Assambleyasi (PACE) vakillari Rossiyani Yevropa Kengashidan chiqarish uchun ovoz bergandi. 16-mart kuni Rossiya Yevropa Kengashidan chiqarib yuborildi. U 26 yildan buyon mazkur tashkilot a’zosi edi.
Izoh (0)