Европа Иттифоқи Украинадаги ҳарбий жиноятлар бўйича Россияга қарши бешинчи санкциялар пакетини маъқуллади, деб ёзмоқда Deutsche Welle.
Нашрнинг ёзишича, янги санкциялар Россия кўмирининг импортига тўлиқ эмбарго қўйиш, шунингдек, Россияга қурол етказиб бериш ва Россия ёғочларининг импортини тақиқлашни ўз ичига олади. Бу ҳақда Франциянинг Европа Иттифоқи кенгашидаги ваколатхонаси Twitter’да ҳам маълум қилган.
Қайд этилишича, мазкур чора-тадбирлар Россиядан қазиб олинадиган ёқилғилар импортини тўлиқ тақиқламайди, бироқ Европа Иттифоқи расмийлари, агар Москва кескинлашишда давом этса, ушбу чора қўлланиши мумкинлигини айтган.
Санкцияларнинг янги тўплами тўртта банк, жумладан «ВТБ» банк учун транзакцияларни тўлиқ тақиқлашни ўз ичига олади. Россия кемалари ва Россия байроғи остида сузиб юрувчи кемаларнинг Европа Иттифоқи портларига кириши тақиқланади.
Санкция рўйхатида тадбиркорлар, журналистлар ва ҳарбийлар бор. Кўриладиган чораларга Россиядан 5,5 миллиард евро миқдорида ёғоч, цемент ва денгиз маҳсулотларини олиб киришни тақиқлаш ҳам киритилган. Чора-тадбирлар тўплами Европа Иттифоқининг расмий журналида эълон қилинганидан (8 апрелда эълон қилиниши кутилмоқда) кейин кучга киради.
Европа Иттифоқи комиссияси ҳисоб-китобларига кўра, кўмирга эмбарго қўйилса Россия йилига 4 миллиард евро даромад йўқотиши мумкин.
Изоҳ (0)