Ukrainada urush boshlanganidan keyin O‘zbekistonda mehmonxonalar bandligi keskin oshdi. Bu haqda Turizmni rivojlantirish davlat qo‘mitasi matbuot xizmati xabar berdi.
28—30-mart kunlari – uch kunlik davrdagi yuklama respublika bo‘yicha 70,8 foizdan ortiq, Toshkent shahrida 83,6 foiz, Samarqandda 62,3 foiz, Qoraqalpog‘istonda 93,9 foiz, Xorazmda 56,3 foiz, Buxoroda 46 foizni tashkil etdi.
Bu juda yaxshi ko‘rsatkichlar bo‘lib, turizm industriyasining o‘sishidan, mehmonxona biznesi uchun esa rentabellikning tez tiklanishidan darak beradi, — deyiladi xabarda.
2017-yilda mehmonxonalarning bandlik darajasi 39,3 foizni, 2019-yilda – 53,1 foizni, pandemiyaning o‘tkir davrida – 22,1 foizni, o‘tgan yili bandlik ko‘rsatkichi 36,3 foizni tashkil etgan edi.
2019 yilning pandemiyadan oldingi davrida 84,8 ming nafar chet el fuqarolari yashagan bo‘lib, umumiy ulushda eng ko‘p rossiyaliklar – 16,8 foizni, qozog‘istonliklar – 15 foizni, tojikistonliklar – 6,3 foizni, xitoyliklar – 6,1 foizni, afg‘onistonliklar – 5,7 foiz, turkiyaliklar - 5,5 foizni tashkil etgan.
Ayni paytda O‘zbekiston chet el sayyohlari uchun to‘liq ochiq. Bu borada barcha cheklovlar olib tashlandi.
2022-yil oxiriga kelib 4,5 million nafargacha xorijiy sayyohlar mamlakatga kirib kelishini kutilmoqda.
Avvalroq Toshkent aeroporti yaqinidagi mehmonxona MIB tomonidan 6,3 mlrd so‘mga auksionga qo‘yilgani haqida xabar berilgan edi.
Izoh (0)