Украинада уруш бошланганидан кейин Ўзбекистонда меҳмонхоналар бандлиги кескин ошди. Бу ҳақда Туризмни ривожлантириш давлат қўмитаси матбуот хизмати хабар берди.
28—30 март кунлари – уч кунлик даврдаги юклама республика бўйича 70,8 фоиздан ортиқ, Тошкент шаҳрида 83,6 фоиз, Самарқандда 62,3 фоиз, Қорақалпоғистонда 93,9 фоиз, Хоразмда 56,3 фоиз, Бухорода 46 фоизни ташкил этди.
Бу жуда яхши кўрсаткичлар бўлиб, туризм индустриясининг ўсишидан, меҳмонхона бизнеси учун эса рентабелликнинг тез тикланишидан дарак беради, — дейилади хабарда.
2017 йилда меҳмонхоналарнинг бандлик даражаси 39,3 фоизни, 2019 йилда – 53,1 фоизни, пандемиянинг ўткир даврида – 22,1 фоизни, ўтган йили бандлик кўрсаткичи 36,3 фоизни ташкил этган эди.
2019 йилнинг пандемиядан олдинги даврида 84,8 минг нафар чет эл фуқаролари яшаган бўлиб, умумий улушда энг кўп россияликлар – 16,8 фоизни, қозоғистонликлар – 15 фоизни, тожикистонликлар – 6,3 фоизни, хитойликлар – 6,1 фоизни, афғонистонликлар – 5,7 фоиз, туркияликлар - 5,5 фоизни ташкил этган.
Айни пайтда Ўзбекистон чет эл сайёҳлари учун тўлиқ очиқ. Бу борада барча чекловлар олиб ташланди.
2022 йил охирига келиб 4,5 миллион нафаргача хорижий сайёҳлар мамлакатга кириб келишини кутилмоқда.
Аввалроқ Тошкент аэропорти яқинидаги меҳмонхона МИБ томонидан 6,3 млрд сўмга аукционга қўйилгани ҳақида хабар берилган эди.
Изоҳ (0)