Бирлашган Миллатлар Ташкилотига аъзо давлатларнинг аксарияти Россиянинг Инсон ҳуқуқлари бўйича кенгаши таркибидан чиқарилишини қўллаб-қувватлади. БМТ Бош Ассамблеясида 93 давлат ушбу қарорни ёқлаб, 24 давлат, жумладан Ўзбекистон қарши овоз берди, яна 58 давлат бетараф қолди.
Украинанинг Буча шаҳрида тинч аҳоли ўлдирилгани маълум бўлгач, АҚШ ва Буюк Британия Россияни Инсон ҳуқуқлари кенгашидан чиқаришни талаб қилди. Россия ҳукумати Бучадаги одамларнинг ўлимига алоқадорлигини рад этмоқда.
Россия Инсон ҳуқуқлари бўйича кенгашдаги ваколат муддати тугагунига қадар овоз бериш ҳуқуқидан маҳрум бўлади, бироқ йиғилишларда қатнаша олади, дея аниқлик киритди «ТАСС».
Кейинроқ «РИА Новости» Россиянинг БМТдаги доимий вакили ўринбосарига таяниб хабар беришича, Россия БМТ Инсон ҳуқуқлари бўйича кенгашдаги ваколатларини муддатидан олдин тугатишга қарор қилган. Россия БМТ Бош Ассамблеяси резолюциясини «ноқонуний ва сиёсий мотивга эга қадам» деб ҳисобламоқда.
Маълумот учун Инсон ҳуқуқлари бўйича кенгаш аъзолари ҳудудий асосда уч йил муддатга сайланади. Россия ва Украина Шарқий Европа давлатларидан 2021 йилдан 2023 йилгача бўлган муддатга сайланганди.
15 март куни Европа Кенгаши Парламент Ассамблеяси (PACE) вакиллари Россияни Европа Кенгашидан чиқариш учун овоз берганди. 16 март куни Россия Европа Кенгашидан чиқариб юборилди. У 26 йилдан буён мазкур ташкилот аъзоси эди.
Изоҳ (0)