Italiya milliy xavfsizlik nuqtayi nazaridan 30 nafar rossiyalik diplomatni mamlakatdan chiqarib yubordi, deb yozmoqda Reuters.
Italiya tashqi ishlar vaziri Luidji Di Mayoning ma’lum qilishicha, Tashqi ishlar vazirligi bosh kotibi Ettore Sekui 5-aprel kuni Rossiyaning Italiyadagi elchisi Sergey Razov bilan uchrashib, uni Italiya hukumatining 30 nafar rossiyalik diplomatni persona non grata deb e’lon qilish va ularni mamlakatdan chiqarib yuborish to‘g‘risidagi qaroridan xabardor qilgan.
“Boshqa Yevropa va Yevroatlantik ittifoqchilar bilan kelishilgan holda qabul qilingan ushbu qadam Rossiya Federatsiyasining Ukrainaga qarshi asossiz tajovuzi oqibatida yuzaga kelgan hozirgi inqirozli vaziyat sharoitida milliy xavfsizligimiz bilan bog‘liq sabablarga ko‘ra zaruriy chora edi”, — deya tushuntirdi vazir.
Italiya TIV rahbarining bayonotidan keyin Rossiya TIV rasmiy vakili Mariya Zaxarova Moskva tegishli javob qaytarishini aytdi.
Eslatib o‘tamiz, avvalroq Daniya, Fransiya, Germaniya, Polsha, Bolgariya, Latviya, Litva va Estoniya Rossiyaning diplomatik vakolatxonalari xodimlarini chiqarib yuborishini ma’lum qilgandi. Yevropa Ittifoqining bir qancha davlatlari, jumladan Belgiya, Niderlandiya va Irlandiya ham o‘nlab rossiyalik diplomatlarni chiqarib yubordi.
Izoh (0)