Avstraliya hukumati Ukrainaga qarshi qurolli tajovuzda ishtirok etgan 67 nafar Rossiya fuqarosiga nisbatan shaxsiy sanksiyalar qo‘llashga qaror qildi. Bu haqda Avstraliya tashqi ishlar vazirligi xabar berdi.
“Navbatdagi sanksiyalar paketi Rossiya tomonidan Bucha va Kiyev atrofidagi boshqa shaharlarda sodir etilgan harbiy jinoyatlarga oid dalillar paydo bo‘lishi ortidan joriy etilmoqda. Avstraliya bu vahshiyliklarni eng keskin tarzda qoralaydi”, — deyiladi xabarda.
Xususan, Rossiyaning Milliy mudofaa nazorati markazi rahbari, Mariupol qassobi deb ataladigan general-polkovnik Mixail Mizinsyev, Rossiya Iqtisodiy rivojlanish vazirligi rahbari Maksim Reshetnikov, shuningdek, bosh vazir o‘rinbosari va hukumat apparati rahbari Dmitriy Grigorenkoga sanksiya qo‘llandi. Sanksiyalar ro‘yxatidan Rossiya Federal Majlisi Davlat dumasi raisining o‘rinbosari Aleksandr Babakov ham bor.
Bundan tashqari, Ukraina Oliy Radasining IX chaqiriq deputati Oleg Voloshin va Melitopol meri deb ataladigan Galina Danilchenko ham sanksiyalar ostida qolgan.
Umumiy hisobda, Avstraliya Ukrainadagi voqealar munosabati bilan 600 ga yaqin jismoniy va yuridik shaxslarga nisbatan sanksiyalar joriy etgan.
Avvalroq Oq uy Rossiya prezidentining voyaga yetgan barcha qizlariga nisbatan sanksiyalar joriy qilgandi. Shuningdek, AQSHning sanksiyalar ro‘yxatiga Rossiya tashqi ishlar vaziri Sergey Lavrovning rafiqasi va qizi, 18 nafar amaldor kiritilgan. Ular orasida Moskva meri Sergey Sobyanin, Rossiya bosh vaziri Mixail Mishustin ham bor.
G‘arb mamlakatlari Rossiya fevral oxirida Ukrainada harbiy harakatlarni boshlaganidan keyin sanksiyalar e’lon qilishni boshlagan, shuningdek, Kiyev viloyatidagi aholi yashash punktlari hamda Bucha shahridan rossiyalik harbiylar chiqib ketganidan keyin minglab tinch aholi vakillarining jasadlari topilganidan so‘ng G‘arbning Moskvaga nisbatan taqiqlari soni ortgan. Rossiya rasmiylari Buchadagi odamlarning o‘limiga aloqadorligini inkor etmoqda.
Izoh (0)