АҚШ «Аэрофлот», Utair ва Azur Air’га нисбатан экспорт санкциялари жорий қилди

АҚШ савдо вазирлиги Россиянинг учта авиакомпанияси «Аэрофлот», Utair ва Azur Air’га нисбатан экспорт санкциялари жорий этди.

Чеклов чораларида авиакомпаниялар нафақат АҚШ маҳсулотларини экспорт қила олмаслиги, балки бошқа мамлакатлар орқали реэкспорт қилмаслиги ҳам кўзда тутилган. Санкциялар келгусида узайтирилиш имконияти билан 180 кун муддатда киритилмоқда.

АҚШ Савдо вазирлиги мазкур қўшимча чоралар авиакомпанияларнинг Россия Украинага бостириб кириши оқибатида қўлланилган санкцияларни бузгани учун ишлаб чиқилганини билдирган.

«Биз уларни нафақат АҚШ товарларини олиш имкониятидан маҳрум қиляпмиз, балки хориждан Америка маҳсулотларини реэкспорт қилишга ҳам тақиқ қўллаяпмиз. Экспорт назоратини бузадиган ҳар қандай компания, айниқса, бу ишни Владимир Путин манфаатлари учун қилганлар, Украина халқига яна зарар келтирганларга нисбатан ҳуқуқий чоралар ҳам кўрилади», — дейилади АҚШ савдо вазири Жин Раймондонинг баёнотида.

Россия авиакомпаниялари АҚШда ишлаб чиқарилган самолётлардан фойдаланади, санкциялар уларга хизмат кўрсатиш ва эҳтиёт қисмларини сотиб олишни тақиқлайди.

Санкциялар туфайли Россия авиакомпанияларининг самолётлари хориждаги лизингчиларнинг талабларини бажармагани туфайли мусодара қилинмоқда. Бу амалий жиҳатдан Россия авиакомпаниялари учоқларининг чет эл давлатларига парвозини тўхтатиб қўйган.

14 мартда Россия президенти Владимир Путин мамлакатда лизингда бўлган хорижий самолётларни рўйхатга олишнинг ҳуқуқий имкониятлари тўғрисидаги қонунни имзолаган. Қонун бу каби самолётларга бир йиллик сертификатлар олинишининг имконини беради, мазкур ҳужжатлар борасида ҳам санкциялар сабаб қийинчиликларга дуч келинган. «Аэрофлот» шундан кейин айрим хориж мамлакатларига парвозларни амалга оширишни қайта бошлаган.

18 март куни АҚШ Савдо вазирлиги Россияга санкциялар киритилганига қарамай парвозларни давом эттираётган самолётлар рўйхатини эълон қилган. Рўйхатда «Аэрофлот»нинг 33 та, Azur Air’нинг 23 та, Utair’нинг 12 та самолёти бор эди. Шунингдек, март бошида Лондон Россияга қарши янги санкцияларни киритгани, улар Британия ҳаво маконида ҳар қандай Россия самолётини ушлаб туриш имконини бериши хабар қилинганди.