Kiyev viloyatidagi Gostomel posyolkasidan hudud Rossiya qo‘shinlari nazoratida bo‘lgan 35 kun davomida 400 dan ortiq odam bedarak yo‘qolgan. Bu haqda Gostomel harbiy boshqarmasi boshlig‘i Taras Dumenko ma’lum qildi.
“Gostomelda unchalik ko‘p jasad topilmagandi, jamoatimiz qishloqlaridan ham o‘ldirilgan aholining jasadlari topildi. Shuningdek, bir necha aholimiz Buchadan topilgan. Bizda Glebovka aholisi Gostomelga kelgani va keyin ular bilan aloqa uzilgani haqida tasdiqlangan ma’lumotlar bor”, — dedi Dumenko.
Uning so‘zlariga ko‘ra, guvohlarning so‘zlaridan, foto va videomateriallardan bedarak yo‘qolganlarning bir qismi halok bo‘lgani ma’lum, biroq ularning jasadi hali topilmagan. Harbiy ma’muriyat boshlig‘i Gostomelda “bosqinchilar o‘z izlarini ehtiyotkorlik bilan berkitishgan” deb taxmin qilmoqda.
O‘z navbatida, Borodyanka meri vazifasini bajaruvchi Georgiy Yerko shaharda 200 ga yaqin odam bedarak yo‘qolganini aytdi. Uning taxminiga ko‘ra, ular Rossiyaning aviazarbalari oqibatida vayron bo‘lgan binolar ostida qolib halok bo‘lgan. Uning bayonoti The New York Times gazetasining shahardan tayyorlagan reportajida keltirgan.
29-mart kuni Istanbulda bo‘lib o‘tgan muzokaralardan so‘ng Rossiya Kiyev va Chernigov yo‘nalishlarida harbiy faollik keskin qisqarishini e’lon qilgandi. 2-aprel kuni Ukraina Mudofaa vazirligi Rossiya qo‘shinlari Kiyev viloyatini tark etganini ma’lum qildi.
Rossiya qo‘shinlari olib chiqilgach, Kiyev viloyati shaharlarida, shu jumladan Buchada halok bo‘lganlarning jasadlari topilgani haqida xabarlar, ularning foto va videolavhalari paydo bo‘ldi. Ukraina hukumati tinch aholi rossiyalik harbiylar tomonidan o‘ldirilganini aytdi. Bucha meri Anatoliy Fedorukning BBC’ga aytishicha, rus harbiylari shaharda 320 ga yaqin tinch aholini o‘ldirgan.
Moskva Kiyev viloyatining aholi punktlarida sodir etilgan qirg‘inlar haqidagi xabarlarni “provokatsiya” va “Kiyev rejimining tomoshasi” deb atadi.
Izoh (0)