Италия миллий хавфсизлик нуқтаи назаридан 30 нафар россиялик дипломатни мамлакатдан чиқариб юборди, деб ёзмоқда Reuters.
Италия ташқи ишлар вазири Луиджи Ди Майонинг маълум қилишича, Ташқи ишлар вазирлиги бош котиби Этторе Секуи 5 апрель куни Россиянинг Италиядаги элчиси Сергей Разов билан учрашиб, уни Италия ҳукуматининг 30 нафар россиялик дипломатни persona non grata деб эълон қилиш ва уларни мамлакатдан чиқариб юбориш тўғрисидаги қароридан хабардор қилган.
«Бошқа Европа ва Евроатлантик иттифоқчилар билан келишилган ҳолда қабул қилинган ушбу қадам Россия Федерациясининг Украинага қарши асоссиз тажовузи оқибатида юзага келган ҳозирги инқирозли вазият шароитида миллий хавфсизлигимиз билан боғлиқ сабабларга кўра зарурий чора эди», — дея тушунтирди вазир.
Италия ТИВ раҳбарининг баёнотидан кейин Россия ТИВ расмий вакили Мария Захарова Москва тегишли жавоб қайтаришини айтди.
Эслатиб ўтамиз, аввалроқ Дания, Франция, Германия, Польша, Болгария, Латвия, Литва ва Эстония Россиянинг дипломатик ваколатхоналари ходимларини чиқариб юборишини маълум қилганди. Европа Иттифоқининг бир қанча давлатлари, жумладан Бельгия, Нидерландия ва Ирландия ҳам ўнлаб россиялик дипломатларни чиқариб юборди.
Изоҳ (0)