Rossiya birinchi marta rublda deyarli 650 mln dollarlik yevroobligatsiyalarni to‘ladi. Bu haqda “Forbes.ru” xabar bermoqda.
Rossiya Moliya vazirligi mablag‘larni milliy hisob-kitob depozitariysiga o‘tkazdi. Bunga xorijiy vakillik bankining ko‘rsatmalarni bajarishdan bosh tortgani sabab bo‘ldi. Xalqaro reyting agentliklari avvalroq xorijiy valyutadagi to‘lovlarni nazarda tutuvchi yevroobligatsiyalar bo‘yicha rubldagi to‘lovlarni defolt sifatida ko‘rishini ma’lum qilgan edi.
Rossiya Moliya vazirligi kupon daromadining nominal qiymatini to‘lash uchun rubldagi mablag‘larni o‘tkazdi, deb xabar qildi vazirlik matbuot xizmati. Milliy hisob-kitob depozitariysiga mablag‘lar 4-aprelda o‘tkazilgan.
Avvalroq Fitch agentligi Rossiyaning dollardagi rubl obligatsiyalari bo‘yicha foizlarni to‘lashi 30 kundan keyin defoltni anglatishi haqida ogohlantirgan edi.
Qarz majburiyatlarini bajarish bilan bog‘liq qiyinchiliklar va defolt tahdidi G‘arb davlatlarining Ukrainadagi urushga javoban Rossiyaga qarshi sanksiyalari tufayli yuzaga keldi.
Sanksiyalar, boshqa narsalar qatorida, Rossiya bankini xalqaro zaxiralarga kirish huquqidan mahrum qildi. Rossiya prezidenti Vladimir Putin o‘zining 6-martdagi farmoni bilan Rossiyaga “nodo‘stona” bo‘lgan mamlakatlar kreditorlari oldidagi valyuta majburiyatlarini rublda to‘lashga ruxsat berdi.
Moliya vaziri Anton Siluanovning ta’kidlashicha, hozirgi vaziyatda ushbu obligatsiyalarni rublda to‘lash qarz oluvchi tomonidan majburiyatlarning bajarilishi hisoblanadi.
Avvalroq Fitch Rossiya suveren kredit reytingini bekor qilgani haqida xabar berilgan edi.
Izoh (0)