Rossiya Liberal-demokratik partiyasi yetakchisi Vladimir Jirinovskiy 75 yoshida vafot etdi. Bu haqda Davlat Dumasi spikeri Vyacheslav Volodin o‘zining Telegram-kanalida ma’lum qildi.
“Og‘ir va uzoq davom etgan xastalikdan so‘ng Vladimir Volfovich Jirinovskiy olamdan o‘tdi... Barchamiz uchun bu qaytarib bo‘lmaydigan yo‘qotish. Uning yorqin xotirasi qalbimizda abadiy qolsin”, — deyiladi xabarda.
Spiker Davlat Dumasi yig‘ilishida ham Liberal-demokratik partiya yetakchisining vafoti haqida ma’lum qilib, bir daqiqalik sukut e’lon qildi. Partiyaning Dumadagi fraksiyasi Jirinovskiyning vafotini tasdiqladi.
Vladimir Jirinovskiy 2-fevral kuni koronavirus bilan Moskvadagi prezident ishlari boshqarmasining markaziy klinik shifoxonasiga yotqizilgandi.
25-mart kuni Mash telegram kanali va senator Aleksandr Pronyushkin Jirinovskiyning o‘limi haqida xabar berdi. Ammo ko‘p o‘tmay Volodin va Liberal-demokratik partiya bu ma’lumotni rad etdi. Pronyushkin siyosatchining vafoti haqidagi postini o‘chirib tashladi va uzr so‘radi. Volodin unga iste’foga chiqishni maslahat berdi. Kreml Jirinovskiyning o‘limi haqidagi mart oyida tarqalgan xabarlarni feyk deb atagan hamda siyosatchining ahvoli og‘irligi va shifokorlar nazoratida ekanini aytgan. Liberal-demokratik partiya esa o‘shanda Jirinovskiyning o‘limi haqida xabar tarqatganlarni sudga berish bilan tahdid qilgan.
Ma’lumot uchun Vladimir Jirinovskiy 1946-yil 25-aprelda Qozog‘iston SSR (hozirgi Qozog‘iston Respublikasi) Olmaota shahrida tug‘ilgandi. 1970-yilda Lomonosov nomidagi Moskva davlat universiteti qoshidagi Sharq tillari institutining tarix va filologiya fakultetini “Turkiya va turk tili” mutaxassisligi bo‘yicha imtiyozli diplom bilan tamomlagan. 1977-yilda Moskva davlat universitetining yuridik fakultetini imtiyozli diplom bilan tugatgan.
Jirinovskiy olti marta Rossiya prezidentligiga nomzodini qo‘ygan. U o‘zining eng yaxshi natijasini 2008-yilgi saylovlarda qo‘lga kiritgan — o‘shanda Dmitriy Medvedev (70,28 foiz) va Gennadiy Zyuganovdan (17,72 foiz) keyin uchinchi (9,35 foiz) o‘rinni egallagan.
Siyosatchi “Vatan oldidagi xizmatlari uchun” ordeni sohibi bo‘lgan, shuningdek, “Shon-sharaf”, Aleksandr Nevskiy ordeni hamda II va I darajali P. A. Stolypin medallari bilan taqdirlangan.
Izoh (0)