“Roskomnadzor” Wikipedia’ni Ukrainadagi voqealarni Rossiyaga qarshi talqin qilishda aybladi. Idora urush haqidagi beshta maqolani o‘chirishni talab qilmoqda

“Roskomnadzor” Wikipedia onlayn-ensiklopediya ma’muriyatidan Rossiya Bosh prokuratura tomonidan Ukrainadagi urushga oid “ishonchsiz ma’lumotlar” deya topilga materiallarni o‘chirib tashlashni talab qildi.

Idoradagilarning ta’kidlashicha, Wikipedia mualliflari qasddan o‘z materillari orqali foydalanuvchilarga yolg‘on ma’lumot berib, “voqealarning faqat ruslarga qarshi talqinini” targ‘ib qilmoqda.

“So‘nggi vaqtlarda Wikipedia Ukrainadagi maxsus harbiy operatsiya va Rossiya Qurolli kuchlarining harakatlariga oid ishonchsiz materiallarni ommaviy joylashtirishni boshladi. Wikipedia ruslar uchun doimiy axborot hujumining yangi chizig‘iga aylandi. Wikipedia’ga joylashtirilgan maqolalarning mualliflari qasddan internet-resurs foydalanuvchilarga yolg‘on ma’lumotlarni taqdim etmoqda. Resursda e’lon qilingan maqolalarda voqealarning faqat Rossiyaga qarshi talqini targ‘ibot qilinmoqda”, — deyiladi xabarda.

Bundan oldin “Russkaya Vikipedia”ning Twitter’dagi sahifasi orqali “Roskomnadzor” birdaniga beshta maqolani o‘chirib tashlashni talab qilayotgani ma’lum qilingandi: “Kiyev uchun urush (2022)”, “Rossiyaning Ukrainadagi bosqinchiligi vaqtidagi harbiy jinoyati”, “Mariupoldagi shifoxonaning o‘qqa tutilishi”, “Vayron bo‘lgan Mariupol teatri (2022)” hamda “Buchadagi qirg‘in”. Aynan qaysi ma’lumotni o‘chirish zarurligiga aniqlik kiritilmagan.

Rossiyaning Ukrainaga qarshi maxsus harbiy operatsiyai boshlanganidan beri “Roskomnadzor” Wikipedia’dan bir necha bor Ukrainaga oid ma’lumotlarni o‘chirib tashlashni talab qildi, aks holda 4 million rublgacha jarimalar bilan tahdid qilgan. Idora hozirga qadar Bosh prokuratura tomonidan Rossiya harbiylarining harakatlariga oid feyk xabarlarni tarqatish deya baholangan 800 dan ortiq resursni bloklagan.

Avvalroq Rossiyada Facebook, Twitter, BBC va qator OAVlar qisman bloklangani haqida xabar berilgan edi. “Roskomnadzor” buni Ukrainadagi harbiy operatsiya to‘g‘risida yolg‘on ma’lumotlar tarqalayotgani bilan izohlagan. Keyinroq YouTube Rossiyada monetizatsiyani vaqtincha to‘xtatdi, mart oxirlarida esa sud rossiyaliklarga Facebook va Instagram’dan foydalanishga ruxsat berdi.