Ilon Mask Twitter kompaniyasining 9,2 foiz ulushini qariyb 3 mlrd dollarga sotib oldi. Bu haqda Bloomberg xabar bermoqda.
Dushanba kuni me’yoriy hujjatlarda Maskning xaridi ma’lum bo‘lganidan keyin Twitter aksiyalari taxminan 26 foizga oshdi. Aksiyalar Ilon Mask uchun 2,89 mln dollarga tushgan.
Mask o‘tgan oy Twitter’da o‘zining 80 milliondan ortiq obunachilari orasida so‘rov o‘tkazib, kompaniya so‘z erkinligi tamoyillariga amal qiladimi yoki yo‘qligini so‘ragan edi. 70 foizdan ortiq foydalanuvchilar “yo‘q” deb javob berganidan so‘ng, u o‘z platformasini yaratish haqida jiddiy o‘ylayotganini aytdi.
Mask Twitter’dagi eng faol shaxslardan biri va muntazam ravishda platformadagi muammolarni tanqid qilib keladi.
Maskning bu harakati Twitter’ning yangi bosh direktori Parag Agraval uchun yana bir katta sinov bo‘ladi, u noyabr oyida kutilmaganda iste’foga chiqqan Jek Dorsining o‘rniga kelgan edi. Agraval mas’uliyatni oshirishga, qarorlarni tezroq qabul qilishga va mahsulot ijrosini yaxshilashga va’da berdi.
Kompaniya o‘sish bo‘yicha ulkan maqsadlarni qo‘ydi, shu jumladan, yillik daromadni 7,5 mlrd dollarga oshirish va 2023-yil oxirigacha kunlik foydalanuvchilarni 315 millionga yetkazish rejalashtirilgan.
Bloomberg Billionaires Index ma’lumotlariga ko‘ra, dunyoning eng boy odami bo‘lgan Mask dushanba kuni bo‘lib o‘tgan dastlabki savdolarda Twitter aksiyalarining o‘sishi hisobiga, mart oyining o‘rtalaridan beri qariyb 1,1 mlrd dollar ishlab oldi.
Tahlilchilarning fikricha, Twitter yillar davomida barqaror o‘sib borayotgan bo‘lsa-da, uning aksiyalari o‘sishi sanoatdagi raqobatdoshlaridan orqada qolmoqda.
Avvalroq Ilon Mask dunyodagi birinchi trillionerga aylanishi mumkinligi haqida xabar berilgan edi.
Izoh (0)