Rossiyaning BMTdagi doimiy vakili Vasiliy Nebenzya matbuot-anjumanida Buchada o‘nlab tinch aholining o‘ldirilishi “rus harbiylarini obro‘sizlantirish, ularni noinsoniy ko‘rsatish va Rossiyada siyosiy bosim o‘tkaziga qaratilgan navbatdagi provakatsiya” hisoblanishini ma’lum qildi.
Rossiya doimiy vakilining ma’lum qilishicha, 4-aprel kuni Ukraina prezidenti Vladimir Zelenskiy Buchaga tashrif buyurib, sodir bo‘lgan holat har qanday madaniyatsiz javobni oqlashini ko‘rsatgan. “U Kiyev rejimi genotsidni urush usuli deb bilishini tasdiqladi”, — deydi Nebenzya.
Rossiyaning BMTdagi doimiy vakili Rossiya tomonining dalillarini yana takrorlab, Bucha ko‘chalarida o‘ldirilgan insonlarning foto va videolar rus qo‘shinlari ushbu hududni tark etganidan bir necha kun o‘tib paydo bo‘lganini aytdi. Uning ta’kidlashicha, Rossiya harbiylari ketgan vaqtdagi videoyozuvlarda qurbonlar jasadi bo‘lmagan.
Nebenzya Buchaga oid videolarning barchasi feyk ekanini aytgan. “Bu urush. Urushdan har narsani kutish mumkin. Urushda tinch aholi ham qurbon bo‘ladi, buni mustasno qilib bo‘lmaydi. Bu hayotning achchiq haqiqati. Ammo Buchadan olingan videolavhalarning uydirma ekani ko‘rinib turibdi. Ushbu lavhalarning barchasi yolg‘on. Ertaga Havfsizlik kengashida biz bu borada dalillarni taqdim etamiz”, — deydi u.
The New York Times gazetasi Nebenzyaning chiqishidan bir necha soat oldin Buchaning sun’iy yo‘ldoshdan olingan suratlarini e’lon qilgan. Uning tahillariga ko‘ra, ko‘chalardagi jasadlar rus harbiylari shaharni nazorat ostida ushlagan vaqtda ham bo‘lgan.
Eslatib o‘tamiz, Kiyev viloyatidagi Bucha shahrida tinch aholining qirg‘in qilingani 2-aprel kuni, Rossiya harbiylari chiqib ketganidan keyin Ukraina armiyasi shahar ustidan nazorat o‘rnatgan paytda ma’lum bo‘ldi. Ukraina prezidenti mahalliy aholining o‘limida rossiyalik askarlarni aybladi. Rossiya Mudofaa vazirligi halok bo‘lganlarning video va suratlarini “provokatsiya” va “G‘arb ommaviy axborot vositalari uchun Kiyev rejimining tomoshasi” deb atadi. Vazirlik ma’lumotlariga ko‘ra, rus harbiylari 30-mart kuni shaharni tark etgunga qadar Bucha shahridagi birorta ham mahalliy aholi “hech qanday zo‘ravonlik harakatlaridan jabr ko‘rmagan”.
Izoh (0)