Livan bosh vaziri o‘rinbosari Saad al-Shami Livan davlati va markaziy banki bankrot bo‘lganini e’lon qildi, deb yozmoqda Reuters.
Siyosatchi davlat moliya sektorining yo‘qotishlarini yengib o‘tishga qodir emasligini, ya’ni uning likvidligi yo‘qligini ma’lum qilgan.
“Afsuski, davlat ham, markaziy bank ham bankrot bo‘ldi, shuning uchun bizda muammolar bor... chiqimlar qilib bo‘lingan”, — dedi bosh vazir o‘rinbosari mahalliy OTV telekanaliga bergan intervyusida.
Unga ko‘ra, chiqimlar davlat, Livan banki, banklar va omonatchilar o‘rtasida taqsimlanadi. Iqtisodiyotdagi muammolar o‘nlab yillar davomida to‘planib kelgan, deya ta’kidladi rasmiy.
“Bir faktni inkor qilib bo‘lmaydi... biz fuqarolar uchun hisobvaraqlaridan pul yechish imkonini ocha olmaymiz, chunki normal holatda shunday qilsa bo‘lardi ”, — dedi al-Shami.
Ayni paytda Livan markaziy banki rahbari Riad Salame bosh vazir o‘rinbosarining bayonotini rad etib, moliya sektoridagi yo‘qotishlarga qaramay, bank o‘zining qonuniy rolini bajarishda davom etayotganini aytdi.
“Markaziy bankning bankrotligi haqidagi tarqalgan ma’lumotlar haqiqatga to‘g‘ri kelmaydi”, — dedi u.
Salamening qo‘shimcha qilishicha, bank pul va kredit to‘g‘risidagi qonunning 70-moddasi bo‘yicha o‘zining qonun hujjatlarida belgilangan majburiyatlarini bajarishda davom etmoqda, ushbu moddada bankka Livan valyutasining yaxlitligini saqlash va iqtisodiy barqarorlikni saqlash vazifasi yuklatilgan.
Jahon banki hisob-kitoblariga ko‘ra, Livan iqtisodiyoti 2019—2021-yillar oralig‘ida qariyb 60 foizga qisqardi, bu hozirgi davrdagi eng yomon moliyaviy inqirozlardan biridir. Bundan tashqari, Livan lirasi o‘z qiymatining 90 foizdan ortig‘ini yo‘qotdi. Banklar norasmiy kapital nazoratini o‘rnatdi, bu esa odamlarni o‘z jamg‘armalariga kirish huquqidan mahrum qildi.
Eslatib o‘tamiz, Livan hukumati 2020-yildayoq mamlakatni bankrot deb e’lon qilgan. Bu mamlakatda norozilik namoyishlari boshlanib, eski hukumat iste’foga chiqishga majbur bo‘lganidan keyin yuz berdi. Bundan tashqari, Bayrut portidagi portlash ham vaziyatga ta’sirini ko‘rsatdi.
Mavzuga doir:
Izoh (0)