Rossiya kungaboqar yog‘i eksportini chekladi. Bu O‘zbekistonga ta’sir qilishi mumkin

Rossiya kungaboqar yog‘i eksportini cheklaydi, deya xabar berdi “Kommersant”.

15-apreldan 31-avgustgacha 1,5 mln tonnalik mahsulot, shuningdek, undan ishlab chiqariladigan ozuqa mahsuloti – shrot uchun kvota joriy etiladi.

Bundan tashqari, Rossiya 1-apreldan boshlab kungaboqar va kolza urug‘larini eksport qilishni butunlay taqiqladi.

Cheklovlar, dunyoda kugaboqar yog‘i va yog‘ mahsulotlari narxining keskin osishi fonidagi Rossiya mahsulotiga bo‘lgan talabning oshib ketgani bilan izohlanmoqda.

O‘zbekistonning bunga nima aloqasi bor?

Rossiya O‘zbekistonga kirib keladigan kungaboqar yog‘ining asosiy importchisi. So‘nggi yillarda uning ulushi deyarli 80 foizga o‘sdi.

Rossiya, shuningdek, butun bozorning yarmidan kamrog‘ini egallagan mahalliy yog‘ uchun asosiy xomashyo yetkazib beruvchilardan biri hisoblanadi.

Bir yil oldin, 2021-yilning bahorida Rossiya cheklovlari va jahon narxlarining o‘sishi O‘zbekistonda yog‘ narxining oshishiga olib kelgan edi.

Import yog‘ va urug‘lar narxining oshishi mamlakatda ishlab chiqariladigan paxta yog‘i bahosining oshishiga ta’sir qilgan.

O‘shanda import uchun imtiyozlar joriy etish, vazirlik va idoralar tomonidan qator chora-tadbirlar orqali muammo hal qilingan edi.

Davlat statistika qo‘mitasi ma’lumotlariga ko‘ra, kungaboqar yog‘i mart oyida yanvar oyiga nisbatan 2,6 foizga, 2021-yilning mart oyiga nisbatan esa 26,9 foizga qimmatlashgan.

Avvalroq mahalliy korxonalar shakarga bo‘lgan talabni to‘liq ta’minlay olishi haqida xabar berilgan edi.