Россия кунгабоқар ёғи экспортини чеклайди, дея хабар берди «Коммерсантъ».
15 апрелдан 31 августгача 1,5 млн тонналик маҳсулот, шунингдек, ундан ишлаб чиқариладиган озуқа маҳсулоти – шрот учун квота жорий этилади.
Бундан ташқари, Россия 1 апрелдан бошлаб кунгабоқар ва колза уруғларини экспорт қилишни бутунлай тақиқлади.
Чекловлар, дунёда кугабоқар ёғи ва ёғ маҳсулотлари нархининг кескин осиши фонидаги Россия маҳсулотига бўлган талабнинг ошиб кетгани билан изоҳланмоқда.
Ўзбекистоннинг бунга нима алоқаси бор?
Россия Ўзбекистонга кириб келадиган кунгабоқар ёғининг асосий импортчиси. Сўнгги йилларда унинг улуши деярли 80 фоизга ўсди.
Россия, шунингдек, бутун бозорнинг ярмидан камроғини эгаллаган маҳаллий ёғ учун асосий хом ашё етказиб берувчилардан бири ҳисобланади.
Бир йил олдин, 2021 йилнинг баҳорида Россия чекловлари ва жаҳон нархларининг ўсиши Ўзбекистонда ёғ нархининг ошишига олиб келган эди.
Импорт ёғ ва уруғлар нархининг ошиши мамлакатда ишлаб чиқариладиган пахта ёғи баҳосининг ошишига таъсир қилган.
Ўшанда импорт учун имтиёзлар жорий этиш, вазирлик ва идоралар томонидан қатор чора-тадбирлар орқали муаммо ҳал қилинган эди.
Давлат статистика қўмитаси маълумотларига кўра, кунгабоқар ёғи март ойида январь ойига нисбатан 2,6 фоизга, 2021 йилнинг март ойига нисбатан эса 26,9 фоизга қимматлашган.
Аввалроқ маҳаллий корхоналар шакарга бўлган талабни тўлиқ таъминлай олиши ҳақида хабар берилган эди.
Изоҳ (0)