Toshkentda 2 gektar yerni 800 ming dollarga sotishga uringan shaxs ushlandi

Toshkentda 2 gektar yer maydonini 800 ming dollar evaziga sotishga uringan shaxs qo‘lga olindi. Bu haqda IIV JQBB Korrupsiya va iqtisodiy jinoyatlarga qarshi kurashish boshqarmasi xabar berdi.

Ma’lum qilinishicha,  U.Ch. ismli shaxs yer olish maqsadida yurgan fuqaro E.N. bilan tanishib qolib, unga tanishi D.ning 4 gektar yer maydoni borligini aytgan va shundan 2 gektar yer maydonini 800 ming dollariga sotishini bildirgan. Biroq yer maydoni taqiqda turgani sababli uni rasmiylashtirib bera olmasligini, kelgusida kerakli tashkilotlar orqali ushbu taqiqni yechib berishini aytgan. Fuqaro E.N. 30-mart kuni IIVga ariza bilan murojaat qilib, mazkur holatga qonuniy chora ko‘rishni so‘ragan.

Arizaga asosan shu kuni Bosh prokuratura, IIV hamda DXX Shayxontohur tumani xodimlari hamkorligida tezkor tadbir o‘tkazilgan. Tadbirda U.Ch. Toshkent shahar Mirzo Ulug‘bek tumanida joylashgan 15-sonli Kardiologiya markazining avtoturargohida ariza muallifidan talab qilgan 80 ming dollarni olgan vaqtda ashyoviy dalillar bilan ushlangan.

Mazkur holat yuzasidan, 30-mart kuni Iqtisodiy jinoyatlarga qarshi kurashish departamentining Shayxontohur tumani tomonidan fuqaro U.Ch. va boshqalarga nisbatan Jinoyat kodeksining 168-moddasi (firibgarlik) 4-qismi “a” bandi bilan jinoyat ishi qo‘zg‘atilgan. U.Ch. Jinoyat-protsessual kodeksining 224-moddasi (jinoyat ishi qo‘zg‘atilgunga qadar ushlab turish tartibi) tartibida ushlangan. Hozirda tergov harakatlari olib borilmoqda.

Avvalroq Samarqandda ko‘p qavatli uy qurish uchun ajratilgan 1 gektar yerni 500 ming dollarga sotishga uringan shaxslar qo‘lga olingani, Urgutda ijara olingan 90 sotix yerni 60 ming dollarga sotishga uringan shaxs ushlangani, Sergelida ijaraga berilgan 2,5 gektar yerni 1,9 mln dollarga rasmiylashtirib berishni va’da qilgan qo‘lga olingani to‘g‘risida xabar berilgandi.