Samarqandda uch nafar fuqaro 16 qavatli turar joy qurish uchun ajratilgan yerni 500 ming dollarga baholab, 250 ming dollarini olayotganda qo‘lga olingan. Bu haqda “Daryo”ga DXXning viloyat boshqarmasi ma’lum qildi.
Samarqand shahar hokimining 2021-yildagi qarori bilan shaharning “Qorasuv” mavzesidan 16 qavatli turar joy binolarini qurish uchun “Sam Qora-Suv Stroy” MCHJga 1 gektar yer maydoni ajratilgan. Ammo qurilish ishlari 2022-yilning dekabr oyiga qadar boshlangan bo‘lishi lozim edi. Yo‘qsa yer zaxiraga qaytarilishi belgilangan bo‘lgan. Buni yaxshi bilgan Samarqand shahrida yashovchi 35 yoshli Y.O., 44 yoshli A.N. va 54 yoshli A.K. o‘zaro jinoiy til biriktirib, yerni sotish harakatiga tushgan.
Ular tanish fuqaroga mazkur yer maydonini 500 ming dollarga hokimiyat idoralaridagi tanishlari orqali rasmiylashtirib berishni va’da qilib, undan kelishilgan mablag‘ning 250 ming dollarini olayotgan vaqtida qo‘lga olingan.
Hozirda holat yuzasidan surishtiruv harakatlari olib borilmoqda.
Izoh (0)