Тошкентда 2 гектар ерни 800 минг долларга сотишга уринган шахс ушланди

Тошкентда 2 гектар ер майдонини 800 минг доллар эвазига сотишга уринган шахс қўлга олинди. Бу ҳақда ИИВ ЖҚББ Коррупция ва иқтисодий жиноятларга қарши курашиш бошқармаси хабар берди.

Маълум қилинишича,  У.Ч. исмли шахс ер олиш мақсадида юрган фуқаро Э.Н. билан танишиб қолиб, унга таниши Д.нинг 4 гектар ер майдони борлигини айтган ва шундан 2 гектар ер майдонини 800 минг долларига сотишини билдирган. Бироқ ер майдони тақиқда тургани сабабли уни расмийлаштириб бера олмаслигини, келгусида керакли ташкилотлар орқали ушбу тақиқни ечиб беришини айтган. Фуқаро Э.Н. 30 март куни ИИВга ариза билан мурожаат қилиб, мазкур ҳолатга қонуний чора кўришни сўраган.

Аризага асосан шу куни Бош прокуратура, ИИВ ҳамда ДХХ Шайхонтоҳур тумани ходимлари ҳамкорлигида тезкор тадбир ўтказилган. Тадбирда У.Ч. Тошкент шаҳар Мирзо Улуғбек туманида жойлашган 15-сонли Кардиология марказининг автотураргоҳида ариза муаллифидан талаб қилган 80 минг долларни олган вақтда ашёвий далиллар билан ушланган.

Мазкур ҳолат юзасидан, 30 март куни Иқтисодий жиноятларга қарши курашиш департаментининг Шайхонтоҳур тумани томонидан фуқаро У.Ч. ва бошқаларга нисбатан Жиноят кодексининг 168-моддаси (фирибгарлик) 4-қисми «а» банди билан жиноят иши қўзғатилган. У.Ч. Жиноят-процессуал кодексининг 224-моддаси (жиноят иши қўзғатилгунга қадар ушлаб туриш тартиби) тартибида ушланган. Ҳозирда тергов ҳаракатлари олиб борилмоқда.

Аввалроқ Самарқандда кўп қаватли уй қуриш учун ажратилган 1 гектар ерни 500 минг долларга сотишга уринган шахслар қўлга олингани, Ургутда ижара олинган 90 сотих ерни 60 минг долларга сотишга уринган шахс ушлангани, Сергелида ижарага берилган 2,5 гектар ерни 1,9 млн долларга расмийлаштириб беришни ваъда қилган қўлга олингани тўғрисида хабар берилганди.