Расман: Диёр Имомхўжаев ПФЛ бош директори этиб тасдиқланди

Диёр Имомхўжев Профессионал футбол лигаси (ПФЛ) бош директори лавозимига тасдиқланди. Бу ҳақда ташкилот матбуот хизмати маълум қилди.

31 март куни ПФЛ Ижроқўмининг йиғилиши бўлиб ўтди. Йиғилишда ташкилот бош директори лавозимига ЎФА президенти киритган тақдимномага асосан Диёр Имомхўжаев номзодини тасдиқлаш масаласи кўриб чиқилган.

Ижроқўмнинг барча аъзолари Имомхўжаев номзодини бош директорликка тасдиқлашга овоз берган. Диёр Имомхўжаев 4 йил муддатга Профессионал футбол лигаси бош директорлигига тасдиқланган.

Эслатиб ўтамиз, Имомхўжаев 2020 йилнинг 25 майидан бери ПФЛ бош директори вазифасини бажарувчи сифатида ишлаб келаётганди.

Диёр Имомхўжаев 1989 йилда Тошкент шаҳрида туғилган. У Ўзбекистон давлат жаҳон тиллари университетининг халқаро журналистика бўлимида таҳсил олган. Спорт журналисти сифатида «Наврўз» радиоси, «Чемпион», «Стадион» ҳамда «Эрудит-Спорт» газеталари ва МТРКда фаолият юритган. Имомхўжаев 2016—2018 йиллар мобайнида «Дарё» интернет нашрида спорт бўлими муҳаррири лавозимида ишлаган.

2018 йилдан Имомхўжаев ПФЛда бош директор ёрдамчиси сифатида иш бошлаган.