29-mart kuni “O‘zbekiston temir yo‘llari” aksiyadorlik jamiyatining axborot-tahliliy media markazi tomonidan “O‘ztemiryo‘lyo‘lovchi” aksiyadorlik jamiyatining yo‘lovchi vagonlarni reysga texnik va texnologik tayyorlash, tamirlash filialiga press-tur tashkil etildi.
Dastavval, filial faoliyati haqida atroflicha ma’lumot berish maqsadida mutasaddilar tomonidan alohida uchrashuv tashkil etildi. Unda qator ommaviy axborot vositalari vakillari yo‘nalish bo‘yicha qiziqarli va sermazmun ma’lumotlarga ega bo‘lishdi. Yo‘lovchi poyezdlar reysga, ya’ni safarga chiqishdan oldin qanday jarayon va nazoratlardan o‘tkazilayotgani haqidagi qiziqtirgan savollariga javob oldilar. Davra suhbati shaklidagi uchrashuvdan so‘ng filial bo‘ylab ekskursiya o‘tkazildi. Dastlab jurnalistlarga poyezd filialga kelgach, birinchi bo‘lib qayerga jo‘natilishi ko‘rsatildi. Ushbu obyekt — maxsus yo‘lak (16-son temir yo‘l deb ataladi).
Yo‘lovchilar temir yo‘l vokzalida kuzatilganidan so‘ng, poyezd aynan shu yerga texnik va sanitariya tekshiruvi uchun zaruriy ta’mirlash va sanitar ko‘rikdan o‘tkazish uchun keltiriladi. Bu yerda, shuningdek, vagondagi yostiq va to‘shak choyshablari, sochiqlar, parda va hokazolar kir yuvish majmuasiga jo‘natiladi. Choy idishlari esa tozalash va yuvish uchun yuboriladi. Bundan tashqari, vagon kuzatuvchilari (provodnik) tomonidan yo‘lovchi vagonlarni topshirish va qabul qilish jarayoni ham bu yerda amalga oshiriladi. So‘ng vagonlarni ichki tozalash dezinfeksiya jarayoni amalga oshirilib, harakat tarkibi maxsus yuvish uskunalari yordamida tozalanadi. Keyingi bosqichda poyezd vagonlari suv va ko‘mir bilan yuklanadi. Barcha bosqichlardan o‘tgandan so‘ng, yo‘lovchi vagonlar ta’mirlash yo‘liga ko‘chiriladi.
Ta’kidlash joizki, mazkur filial yo‘lovchi vagonlarni reysga tayyorlash respublika miqiyosida yagona depo hisoblanadi. Filialda qabul qilingan texnologik jarayonga muvofiq yo‘lovchi poyezdlar harakatining amaldagi harakat jadvalini hisobga olgan holda faoliyat olib boriladi. Filialda olib borilayotgan barcha jarayonlar tuzilgan kunlik ish rejasiga muvofiq poyezdlar harakatining amaldagi jadvali, poyezdlar o‘z vaqtida shakllantirilishi va ishlarning texnologik jarayonini hisobga olgan holda amalga oshiriladi.
Press-tur davomida ommaviy axborot vositalari vakillari, shuningdek, kir yuvish majmuasiga tashrif buyurishdi. Bu yerda vagonlarda ishlatilgan mato anjomlarini yuvish, mexanik va kimyoviy tozalash ishlari amalga oshiriladi. Darvoqe, ushbu majmua ochilganiga atigi 3 oy bo‘lgani haqida aytib o‘tildi. Avvallari ishlatilgan choyshablarni yuvish va tozalash uchun xususiy sektor xizmatlariga murojaat etilar edi. Yangi kir yuvish majmuasi ochilgan 146 nafar ishchi xizmatchi bandligi ta’minlandi. Bu yerda 30 kilogrammdan 100 kilogrammgacha bo‘lgan kir yuvish uskunalari ishlatilmoqda. Filialda, shuningdek, vagon choyshablari va temiryo‘lchilar uchun ayrim turdagi maxsus kiyim-kechaklar tikish sexi ham mavjud.
Shuningdek, ommaviy axborot vositalari vakillari o‘quv-texnik mashg‘ulotlarini o‘tkazish, mutaxassislar malakasini oshirish, yosh mutaxassislarga amaliy mashg‘ulotlar o‘tkazish uchun barcha zarur ko‘rgazmali qurol-anjomlari bilan jihozlangan, ixtisoslashtirilgan o‘quv yo‘lovchi vagon bilan ham tanishdilar.
Tadbir davomida xalqaro va mahalliy yo‘lovchi poyezdlarini reysga tayyorlashdagi farqlar haqida ham aytib o‘tildi. Malakali mutaxassislar xalqaro yo‘lovchi poyezdlarida yangi standartlarga ko‘ra, biohojatxona o‘rnatilinishi rejalashtirilmoqda. Bundan tashqari, xalqaro yo‘nalishdagi yo‘lovchi poyezdlarida, vagon restoranlarda uch mahal issiq ovqat tayyorlanishi ta’kidlandi.
Filial bo‘ylab uyushtirilgan sayohat yakunida jurnalistlar yo‘lovchi poyezdlar reysga tayyorgarlik jarayonining yakuniy bosqichi, ya’ni harakat tarkibi to‘liq shakllangan ko‘rinishi bilan ham yaqindan tanishdilar.
Ma’lumot sheriklik huquqi asosida tayyorlandi.
Izoh (0)