29 март куни «Ўзбекистон темир йўллари» акциядорлик жамиятининг ахборот-таҳлилий медиа маркази томонидан «Ўзтемирйўлйўловчи» акциядорлик жамиятининг йўловчи вагонларни рейсга техник ва технологик тайёрлаш, тамирлаш филиалига пресс-тур ташкил этилди.
Даставвал, филиал фаолияти ҳақида атрофлича маълумот бериш мақсадида мутасаддилар томонидан алоҳида учрашув ташкил этилди. Унда қатор оммавий ахборот воситалари вакиллари йўналиш бўйича қизиқарли ва сермазмун маълумотларга эга бўлишди. Йўловчи поездлар рейсга, яъни сафарга чиқишдан олдин қандай жараён ва назоратлардан ўтказилаётгани ҳақидаги қизиқтирган саволларига жавоб олдилар. Давра суҳбати шаклидаги учрашувдан сўнг филиал бўйлаб экскурсия ўтказилди. Дастлаб журналистларга поезд филиалга келгач, биринчи бўлиб қаерга жўнатилиши кўрсатилди. Ушбу объект — махсус йўлак (16-сон темир йўл деб аталади).
Йўловчилар темир йўл вокзалида кузатилганидан сўнг, поезд айнан шу ерга техник ва санитария текшируви учун зарурий таъмирлаш ва санитар кўрикдан ўтказиш учун келтирилади. Бу ерда, шунингдек, вагондаги ёстиқ ва тўшак чойшаблари, сочиқлар, парда ва ҳоказолар кир ювиш мажмуасига жўнатилади. Чой идишлари эса тозалаш ва ювиш учун юборилади. Бундан ташқари, вагон кузатувчилари (проводник) томонидан йўловчи вагонларни топшириш ва қабул қилиш жараёни ҳам бу ерда амалга оширилади. Сўнг вагонларни ички тозалаш дезинфекция жараёни амалга оширилиб, ҳаракат таркиби махсус ювиш ускуналари ёрдамида тозаланади. Кейинги босқичда поезд вагонлари сув ва кўмир билан юкланади. Барча босқичлардан ўтгандан сўнг, йўловчи вагонлар таъмирлаш йўлига кўчирилади.
Таъкидлаш жоизки, мазкур филиал йўловчи вагонларни рейсга тайёрлаш республика миқиёсида ягона депо ҳисобланади. Филиалда қабул қилинган технологик жараёнга мувофиқ йўловчи поездлар ҳаракатининг амалдаги ҳаракат жадвалини ҳисобга олган ҳолда фаолият олиб борилади. Филиалда олиб борилаётган барча жараёнлар тузилган кунлик иш режасига мувофиқ поездлар ҳаракатининг амалдаги жадвали, поездлар ўз вақтида шакллантирилиши ва ишларнинг технологик жараёнини ҳисобга олган ҳолда амалга оширилади.
Пресс-тур давомида оммавий ахборот воситалари вакиллари, шунингдек, кир ювиш мажмуасига ташриф буюришди. Бу ерда вагонларда ишлатилган мато анжомларини ювиш, механик ва кимёвий тозалаш ишлари амалга оширилади. Дарвоқе, ушбу мажмуа очилганига атиги 3 ой бўлгани ҳақида айтиб ўтилди. Авваллари ишлатилган чойшабларни ювиш ва тозалаш учун хусусий сектор хизматларига мурожаат этилар эди. Янги кир ювиш мажмуаси очилган 146 нафар ишчи хизматчи бандлиги таъминланди. Бу ерда 30 килограммдан 100 килограммгача бўлган кир ювиш ускуналари ишлатилмоқда. Филиалда, шунингдек, вагон чойшаблари ва темир йўлчилар учун айрим турдаги махсус кийим-кечаклар тикиш цехи ҳам мавжуд.
Шунингдек, оммавий ахборот воситалари вакиллари ўқув-техник машғулотларини ўтказиш, мутахассислар малакасини ошириш, ёш мутахассисларга амалий машғулотлар ўтказиш учун барча зарур кўргазмали қурол-анжомлари билан жиҳозланган, ихтисослаштирилган ўқув йўловчи вагон билан ҳам танишдилар.
Тадбир давомида халқаро ва маҳаллий йўловчи поездларини рейсга тайёрлашдаги фарқлар ҳақида ҳам айтиб ўтилди. Малакали мутахассислар халқаро йўловчи поездларида янги стандартларга кўра, биоҳожатхона ўрнатилиниши режалаштирилмоқда. Бундан ташқари, халқаро йўналишдаги йўловчи поездларида, вагон ресторанларда уч маҳал иссиқ овқат тайёрланиши таъкидланди.
Филиал бўйлаб уюштирилган саёҳат якунида журналистлар йўловчи поездлар рейсга тайёргарлик жараёнининг якуний босқичи, яъни ҳаракат таркиби тўлиқ шаклланган кўриниши билан ҳам яқиндан танишдилар.
Маълумот шериклик ҳуқуқи асосида тайёрланди.
Изоҳ (0)