2021-yilda to‘g‘ridan to‘g‘ri xorijiy investitsiyalarning sof kirib kelishi o‘tgan yilning mos davriga nisbatan 18 foizga ko‘payib, 2 mlrd dollarni tashkil qildi. Bu haqda Markaziy bank hisobotida ma’lum qilindi.
2020-yilda bu ko‘rsatkich 1,7 mlrd dollarni tashkil qilgan edi. O‘tgan yilda mamlakatga jalb qilingan chet el investitsiyalarining sof o‘sishi 1,5 mlrd dollarga teng bo‘ldi.
Mamlakatga jalb qilingan to‘g‘ridan to‘g‘ri xorijiy investitsiyalarning hajmi mahsulot taqsimotiga oid bitimlar (MTB) doirasida investitsiyalar hajmining ortishi bilan qisman qoplandi.
Yirik kompaniyalardan olingan qarzlar bo‘yicha majburiyatlarning sof o‘sishi 435 mln dollarni tashkil qilib, 2020-yilga nisbatan qariyb 2,8 barobarga o‘sish kuzatildi.
Shuningdek, xorijiy investorlar tomonidan daromadlarning qayta investitsiya qilinishi o‘tgan yilning mos davriga nisbatan 3 foizga kamayib, 407 mln dollarga teng bo‘ldi. 2020-yilda bu ko‘rsatkich 419,3 mln dollar bo‘lgan edi.
2021-yilda portfel investitsiya operatsiyalari savdosi manfiy ko‘rinishda shakllanib, 2,0 mlrd dollarni tashkil qildi. Bu holat o‘tgan yilda xalqaro moliya bozorlarida jami 5 ta xalqaro obligatsiyalar joylashtirilishi bilan izohlanadi.
Bular quyidagilar:
- Davlat obligatsiyasi 635 mln dollar;
- Davlat obligatsiyasi 2,5 trln so‘m;
- “O‘zneftegaz” obligatsiyasi 700 mln dollar;
- UzAvto Motors obligatsiyasi 300 mln dollar;
- “Ipoteka bank” obligatsiyasi 785 mlrd so‘m.
Aktivlar
“Boshqa investitsiyalar” komponenti bo‘yicha aktivlarning sof o‘sishi 2021-yilda 4,3 mlrd dollar bo‘ldi.
Ushbu komponentning asosiy tarkibiy qismi jismoniy shaxslarning xorijiy valyutadagi jamg‘armalari, shuningdek, savdo kreditlari va debitor qarzdorliklari hisoblanadi. Ularning o‘sishi mos ravishda 3,3 mlrd dollar va 970 mln dollarni tashkil etdi.
Majburiyatlar
“Boshqa investitsiyalar” komponenti bo‘yicha 2021-yil mobaynida majburiyatlarning sof o‘sishi 6,1 mlrd dollarni tashkil qildi.
Bunda asosiy ulush (72 foizi yoki 4,4 mlrd dollar) “Kreditlar va qarzlar” komponentiga to‘g‘ri kelib, asosan banklar va nomoliyaviy korxonalar tomonidan jalb qilingan qarzdorlik hisobiga shakllandi.
Avvalroq Toshkent investitsiya forumi yakuni bo‘yicha 7,8 mlrd dollarlik aniq shartnomalar va investitsiya bitimlar paketi imzolangani haqida xabar berilgan edi.
Izoh (0)