Buxoroda avtotransport vositasiga noqonuniy gaz ballon o‘rnatgan tashkilot rahbarlari javobgarlikka tortildi. Bu haqda “Daryo”ga viloyat IIB YHXB axborot xizmati rahbari Ulug‘bek Shukurullayev xabar berdi.
Viloyat IIB YHXB xodimlari avtotransport vositalariga o‘rnatilgan gaz ballonlaridan foydalanishda kelib chiqayotgan ko‘ngilsizliklar sababini aniqlash maqsadida nazorat reydlari o‘tkazgan.
Reydlar davomida viloyatda faoliyat yurituvchi uch nafar mansabdor o‘z xizmat avtomobiliga noqonuniy tarzda gaz ballon o‘rnatgani ma’lum bo‘lgan.
“Haydovchilar ushbu noqonuniy xatti-harakatlaridan rahbarlari xabardorligini aytib, bunga mansabdorlarning og‘izaki topshirig‘iga ko‘ra qo‘l urganini ma’lum qilgan. Oqibatini bilib o‘zboshimchalikka yo‘l qo‘ygan uch nafar rahbar qonuniy javobgarlikka tortildi”, — deydi viloyat IIB YHXB axborot xizmati rahbari Ulug‘bek Shukurullayev.
Viloyat Yo‘l harakati xavfsizligi boshqarmasi axborot xizmati rahbari “Daryo” muxbirining javobgarlikka tortilgan rahbarlar aynan qaysi tashkilot mas’ullari ekani to‘g‘risidagi savolini ochiq qoldirgan.
Shukurullayevning qo‘shimcha qilishicha, viloyatda, shuningdek, me’yoridan ortiq bosimda gaz to‘ldirayotgan 5 ta va tegishli hujjatlari bo‘lmagan yoki gaz balloni sinovdan o‘tkazilmagan avtomobilga gaz to‘ldirayotgan 16 ta shoxobcha ham javobgar qilingan.
“Viloyatda noqonuniy tarzda gaz moslamasi o‘rnatilgan 89 ta, gaz ballonlari sinovdan o‘tkazilmagan 34 ta transport vositalari borligi aniqlandi. Umuman talabga javob bermaydigan 29 ta gaz balloni yechib olindi. Ularning haydovchilariga nisbatan o‘rnatilgan tartibda hujjatlar rasmiylashtirildi”, — deydi Ulug‘bek Shukurullayev.
Izoh (0)