2021 йилда тўғридан-тўғри хорижий инвестицияларнинг соф кириб келиши ўтган йилнинг мос даврига нисбатан 18 фоизга кўпайиб, 2 млрд долларни ташкил қилди. Бу ҳақда Марказий банк ҳисоботида маълум қилинди.
2020 йилда бу кўрсаткич 1,7 млрд долларни ташкил қилган эди. Ўтган йилда мамлакатга жалб қилинган чет эл инвестицияларининг соф ўсиши 1,5 млрд долларга тенг бўлди.
Мамлакатга жалб қилинган тўғридан-тўғри хорижий инвестицияларнинг ҳажми маҳсулот тақсимотига оид битимлар (МТБ) доирасида инвестициялар ҳажмининг ортиши билан қисман қопланди.
Йирик компаниялардан олинган қарзлар бўйича мажбуриятларнинг соф ўсиши 435 млн долларни ташкил қилиб, 2020 йилга нисбатан қарийб 2,8 баробарга ўсиш кузатилди.
Шунингдек, хорижий инвесторлар томонидан даромадларнинг қайта инвестиция қилиниши ўтган йилнинг мос даврига нисбатан 3 фоизга камайиб, 407 млн долларга тенг бўлди. 2020 йилда бу кўрсаткич 419,3 млн доллар бўлган эди.
2021 йилда портфел инвестиция операциялари савдоси манфий кўринишда шаклланиб, 2,0 млрд долларни ташкил қилди. Бу ҳолат ўтган йилда халқаро молия бозорларида жами 5 та халқаро облигациялар жойлаштирилиши билан изоҳланади.
Булар қуйидагилар:
- Давлат облигацияси 635 млн доллар;
- Давлат облигацияси 2,5 трлн сўм;
- «Ўзнефтегаз» облигацияси 700 млн доллар;
- UzAvto Motors облигацияси 300 млн доллар;
- «Ипотека банк» облигацияси 785 млрд сўм.
Активлар
«Бошқа инвестициялар» компоненти бўйича активларнинг соф ўсиши 2021 йилда 4,3 млрд доллар бўлди.
Ушбу компонентнинг асосий таркибий қисми жисмоний шахсларнинг хорижий валютадаги жамғармалари, шунингдек, савдо кредитлари ва дебитор қарздорликлари ҳисобланади. Уларнинг ўсиши мос равишда 3,3 млрд доллар ва 970 млн долларни ташкил этди.
Мажбуриятлар
«Бошқа инвестициялар» компоненти бўйича 2021 йил мобайнида мажбуриятларнинг соф ўсиши 6,1 млрд долларни ташкил қилди.
Бунда асосий улуш (72 фоизи ёки 4,4 млрд доллар) «Кредитлар ва қарзлар» компонентига тўғри келиб, асосан банклар ва номолиявий корхоналар томонидан жалб қилинган қарздорлик ҳисобига шаклланди.
Аввалроқ Тошкент инвестиция форуми якуни бўйича 7,8 млрд долларлик аниқ шартномалар ва инвестиция битимлар пакети имзолангани ҳақида хабар берилган эди.
Изоҳ (0)