Turkiya prezidenti Rajab Toyyib Erdo‘g‘on O‘zbekistonda bo‘lib turibdi. Ayni vaqtda ikki mamlakat yetakchilari ishtirokida O‘zbekiston—Turkiya strategik sheriklik kengashining ikkinchi yig‘ilishi bo‘lib o‘tmoqda, deb xabar “Daryo” muxbiri.
Qayd etilishicha, Turkiya rahbari ham Shavkat Mirziyoyevni Navro‘z bayrami bilan qutlagan.
“Navro‘z bayrami, muborak Ramazon oyi turk olami, Islom dunyosiga tinchlik va baraka olib keladi. Ota yurtimizga tashrif buyurganimizdan mamnunman. Dipolmatik aloqalarimiz o‘rnatilganiga 30 yil to‘lganidan xursandman. Olti yildan buyon qardoshim qat’iylik bilan amalga oshirayotgan islohotlarni yuksak baholaymiz. Bundan keyin ham Turkiya O‘zbekistonning strategik hamrohi sifatida qoladi”, — deydi Rajab Toyyib Erdo‘g‘on.
Eslatib o‘tamiz, Shavkat Mirziyoyevning taklifiga binoan Turkiya prezidenti Rajab Toyyib Erdo‘g‘on 29—30-mart kunlari rasmiy tashrif bilan O‘zbekistonda bo‘lishi xabar qilingandi. 29-mart kuni Ko‘ksaroy qarorgohida Erdo‘g‘onni rasmiy kutib olish marosimi bo‘lib o‘tdi.
So‘ng ikki mamlakat yetakchilari ishtirokida O‘zbekiston—Turkiya strategik sheriklik kengashining ikkinchi yig‘ilishi bo‘lib o‘tdi. Shavkat Mirziyoyev muloqot avvalida Turkiya yetakchisi va xalqini Navro‘z bayrami bilan tabriklab, “yetakchi turk kompaniyalar bilan aniq loyihalar sonini ko‘paytirish niyatida” ekanini aytib o‘tdi.
Shuningdek, Shavkat Mirziyoyev ta’lim sohasida hamkorlik davom ettirilib, mamlakatda yangi universitetlar ish boshlashini aytib o‘tgan. “O‘tgan yili Anqara va Istanbul shaharlarida O‘zbekiston madaniyat kunlari muvaffaqiyatli o‘tkazildi. Joriy yilda Toshkent va Samarqand shaharlarida Turkiya madaniyat kunlarini o‘tkazishni taklif qilaman”, — deydi O‘zbekiston prezidenti.
Izoh (0)