Tojikiston va O‘zbekiston hukumatlari o‘rtasida 2018-yil 9-martda imzolangan “Fuqarolarning o‘zaro kelib-ketishlari to‘g‘risida”gi bitimga o‘zgartirish kiritildi. Bu haqda Tojikiston parlamentiga tayanib, Asia-Plus xabar berdi.
Imzolangan protokol fuqarolarning ikki davlat hududida vaqtincha ro‘yxatdan o‘tmasdan bo‘lish muddatini 10 kungacha uzaytiradi. Oldinlari ushbu muddat uch sutkani tashkil etardi.
“Bir mamlakat fuqarosi ikkinchi mamlakat hududiga o‘tganda, qabul qiluvchi tomonning davlat chegarasini kesib o‘tgan paytdan e’tiboran 10 ish kuni mobaynida yashash joyidagi davlatning vakolatli organlarida ro‘yxatdan o‘tish va vaqtincha qayd etish majburiyatidan ozod qilinadi”, — deyiladi hujjat matnida.
O‘zaro kelib-ketish to‘g‘risidagi bitimga muvofiq O‘zbekiston va Tojikiston fuqarolari vizasiz 30 sutkagacha tomonlar davlatlari hududiga kirishlari, chiqishlari, undan tranzit o‘tishlari va unda vaqtincha bo‘lishlari mumkin.
Eslatib o‘tamiz, 2022-yilning 15-martidan boshlab Tojikiston—O‘zbekiston davlat chegarasidagi nazorat-o‘tkazish punktlari faoliyati odatdagi ish rejimiga o‘tkazildi.
Izoh (0)