28 март куни бош вазир ўринбосари — инвестициялар ва ташқи савдо вазири Сардор Умурзоқов раҳбарлигида ташқи савдо фаолиятининг бугунги ҳолати ва уни рағбатлантириш бўйича навбатдаги чора-тадбирларни муҳокама қилишга бағишланган йиғилиш бўлиб ўтди. Бу ҳақда Инвестициялар ва ташқи савдо вазирлиги матбуот хизмати хабар берди.
Йиғилишда тегишли вазирликлар, идоралар, тармоқ бирлашмалари, тижорат банклари ҳамда Қорақалпоғистон Республикаси, вилоятлар ва Тошкент шаҳрининг маҳаллий ҳокимият органлари раҳбарлари иштирок этган.
Мутасадди раҳбарлар тармоқлар ва ҳудудлар кесимида экспорт фаолиятининг бугунги ҳолати, маҳаллий ишлаб чиқарувчилар ва экспортчиларни қўллаб-қувватлаш бўйича кўрилаётган чора-тадбирлар ҳамда бу борада мавжуд муаммолар юзасидан ҳисобот берган. Тадбиркорлар ва экспортчилар муаммоларини ҳал қилишда уларни қўллаб-қувватлаш бўйича олиб борилаётган ишларнинг сустлиги туфайли алоҳида раҳбарлар фаолияти қаттиқ танқид қилинган.
Жумладан, Қорақалпоғистон Республикаси, Андижон, Бухоро, Жиззах, Қашқадарё, Навоий, Наманган, Самарқанд, Сирдарё, Тошкент, Фарғона, Хоразм вилоятларининг туман ва шаҳарлари ҳокимларининг 31 нафар ўринбосари, шунингдек, «Ўзтўқимачиликсаноат» ҳамда «Ўзсаноатқурилишматериаллари» уюшмалари каби тармоқ бирлашмалари раҳбарлари интизомий жавобгарликка тортилган.
Шунингдек, мамлакат экспорт салоҳиятини юксалтириш, янги истиқболли бозорларни кашф этиш ҳамда экспортга етказиб бериш йўналишларини диверсификация қилиш учун янги захира ва имкониятларни аниқлаш ҳамда сафарбар қилиш бўйича тизимли ишларни давом эттириш зарурлиги таъкидланган.
Йиғилиш якунида вазирликлар, идоралар, тижорат банклари ва маҳаллий ҳокимликлар раҳбарларига берилган вазифалар ижроси юзасидан қўшимча манзилли топшириқлар берилган. Уларнинг ўз вақтида бажарилишини назорат қилиш Бош прокуратура томонидан амалга оширилади.
Эслатиб ўтамиз, 16 март куни Давлат солиқ қўмитасига ташриф буюрган президент Шавкат Мирзиёев тадбиркорларни синдиришга ҳеч кимга ҳеч қачон рухсат бермаслигини таъкидлаганди. «Ҳозирча бизда ҳеч кимда таҳлил йўқ. Ҳамма нарсани бир хил бажарамиз. Менга ундай бажариш керак эмас. Менга адолатли бажариш керак, инсофли бажариш керак. Мен энди-энди шу беш йилда тадбиркорларни оёққа қўйяпман, уларни синдиришга ҳеч кимга ҳеч қачон рухсат бермайман», – деган эди давлат раҳбари.
Изоҳ (0)