2021-yilning aprelida Bosh prokuraturaning 33 yoshli xodimi Samir Rahmonov ish vaqtida yurak xuruji sabab vafot etgandi. Noyabrda esa uning otasi qonunda belgilangan tartibda nafaqa pullari to‘lab berilmagani uchun Bosh prokuratura ustidan sudga murojaat qilgandi.
O‘shanda ish Toshkent shahar fuqarolik ishlari bo‘yicha sudlov hay’atida ko‘rib chiqilgan va marhumning otasi boquvchisini yo‘qotganlik uchun nafaqa olish huquqiga ega emasligi aniqlangandi. Ish birinchi instansiya sudiga marhumning turmush o‘rtog‘i ishtirokida ko‘rib chiqish uchun yuborilgan edi. Toshkent shahar sudlari matbuot xizmatining xabar berishicha, Samirning otasi — A.Rahmonov vafot etgani sababli sudning 2022-yil 10-martdagi ajrimi bilan uning da’vo arizasi ish yurituvidan tugatilgan.
Sudning tashabbusi bilan da’vogar tomonidan mustaqil talab bilan arz qiluvchi uchinchi shaxs sifatida jalb qilingan N.Rahmonova (turmush o‘rtog‘i) sudga javobgar Bosh prokuraturaga nisbatan turmush o‘rtog‘ining ish joyida vafoti munosabati bilan voyaga yetmagan farzandlari va o‘zi uchun nafaqa, sug‘urta tovoni va ma’naviy zarar undirish to‘g‘risidagi da’vo arizasi bilan murojaat qilgan.
Fuqarolik ishlari bo‘yicha Mirobod tumanlararo sudining 2022-yil 28-martdagi hal qiluv qaroriga asosan N.Rahmonovaning da’vo talablari qisman qanoatlantirilgan.
“Javobgardan N.Rahmonovaning foydasiga 951 million 275,9 ming so‘m miqdorida bir yo‘la to‘lanadigan nafaqa puli va 20 million so‘m miqdorida ma’naviy zarar undirilishi hamda davlat foydasiga 76 million 642 ming so‘m davlat boji to‘lanishi belgilandi”, — deyiladi xabarda.
Izoh (0)