13 million aholi Ukrainadan keta olmayapti — BMT

Birlashgan Millatlar Tashkiloti ukrainalik qochoqlar haqidagi yangilangan ma’lumotlarni taqdim etdi.

BMTning inson huquqlari bo‘yicha Oliy komissari boshqarmasi Twitter’dagi sahifasida 3,8 million odam 24-fevralda urush boshlanganidan beri Ukrainadan chiqib ketganini xabar qilgan.

Boshqarma ma’lumotiga ko‘ra, 6,5 million ukrainalik mamlakat ichida boshqa yerga ko‘chib o‘tgan. Kamida 13 million odam hujumlarga uchragan hududlarda yoki xavf darajasi oshgan, ko‘priklar, yo‘llar vayron bo‘lgan, shuningdek, resurslar yetishmaydigan joylarda qolib ketgan.

“Ukraina ichida fuqarolarni evakuatsiya qilish uchun xavfsiz yo‘laklar tashkil qilish va ularning himoyalanishi kafolatlash dolzarb muammo bo‘lib qolmoqda. Gumanitar yordamni yetkazib berish esa xavfli va qiyin vazifaga aylangan”, – degan BMTning qochoqlar masalalari bo‘yicha Oliy komissari Filippo Grandi.

U ikkala tomonni ham tinch aholini evakuatsiya qilish uchun xavfsiz yo‘laklar bilan ta’minlashga, mamlakat miqyosida fuqarolarga ijtimoiy yordam ko‘rsatish uchun imkoniyat yaratishga chaqirgan.

Avval BMT jarayonning miqyosi va voqealar rivojining tezligidan kelib chiqib, Ikkinchi jahon urushidan keyin kuzatilgan eng katta migratsiya inqirozi boshlanayotganini qayd etgan. Qayd etilishicha, xorijdagi ukrainalik qochoqlarning qariyb yarmi bolalar.

Shuningdek, AQSHning Ukrainadagi urushdan qochayotgan 100 ming nafar qochqinni qabul qilishni rejalashtirayotgani haqida xabar berilgan. Polsha esa ukrainaliklar grivna banknotalarini polyak zlotiylariga konvertatsiya qilish mumkinligini bildirgan.