Россия президенти ва мамлакат олий бош қўмондони Владимир Путин Рамзан Қодировга генерал-лейтенант ҳарбий унвонини берди. Бу ҳақда Чеченистон ҳудудий парламенти спикери Магомед Даудов «ВКонтакте»даги саҳифасида маълум қилган.
«Чеченистон республикаси раҳбари, Россия қаҳрамони Рамзан Аҳматович Қодировни Россия президенти, олий бош қўмондони Владимир Владимирович Путин томонидан генерал-лейтенант ҳарбий унвони берилгани билан табриклайман», — деб ёзган Даудов.
Чеченистон парламентининг спикери президентнинг бу борадаги тегишли фармонини ўз постига илова қилмаган, Кремль расмий сайтида ҳам ушбу ҳужжат ҳали эълон қилингани йўқ.
Рамзан Қодиров 45 ёшда. У 2007 йил февраль ойидан бери Чеченистонга раҳбарлик қилиб келмоқда ва Россия федерал ҳудудлари орасида бир республикани энг кўп бошқарган етакчи ҳисобланади.
Чеченистон раҳбари 2020 йил июль ойида Россия гвардиясининг генерал майори унвонига лойиқ кўрилганди. Бундан ташқари, у мамлакатдаги энг олий унвони Россия Федерацияси қаҳрамони бўлган, шунингдек «Ватан олдидаги хизматлари учун» III даражали ордени, «Жасорат» ордени, «Шараф» ордени ва бошқа давлат мукофотларининг эгаси ҳисобланади.
2020 йил якунларига кўра, Қодиров энг бой Россия губернатори деб топилган: у бир йил ичида 381,19 миллион рубль ишлаб олган. Охирги икки йилда Чеченистон раҳбарининг даромади 50 бараварга ошган: у 2018 йилда 7,5 миллион рублни декларация қилган бўлса, 2019 йилда ушбу маблағ 148 миллион рублга етган.
Изоҳ (0)