Yevrokomissiya Rossiyada davlat boshqaruvi YI vakolati doirasidagi masala emasligini ma’lum qildi

Yevropa ittifoqining xorijiy ishlar bo‘yicha yuqori vakili Jozep Borrell Rossiyada hukumat, rahbariyat almashinuvini istamasligini bildirdi. Bu haqda Yevrokomissiyaning rasmiy vakili Erik Mamer ma’lum qilgan, deb yozmoqda “Interfaks”.

“Yevrokomissiya raisining o‘rinbosari va YIning yuqori lavozimdagi vakilining bayonotida hammasi ochiq-oydin aytildi. Gap Rossiya xalqining irodasi hamda erkin saylash huquqi bilan bog‘liq. Bu masalani ular uchun biz hal qilmaymiz”, – degan Yevrokomissiya matbuot kotibi Bryusseldagi brifingda.

Mamer AQSH prezidenti Jo Baydenning Rossiyadagi hukumat almashinuvi haqidagi mulohazalari fonida Borrellning ushbu mavzudagi pozitsiyasini izohlagan. Yevrokomissiya vakili YI diplomatiyasi rahbarining bayonoti bilan tanishilsa uning bu boradagi pozitsiyasi yaqqol ko‘rinishini ta’kidlagan.

Bayden 26-mart kuni Varshavada Rossiya rahbariyatini yana bir marta tanqid qilgan, keyinchalik Putinning hukumat tepasida qolmasligi kerakligini bildirgan.

Ma’lum muddat o‘tgach AQSH administratsiyasi Baydenning ushbu fikrlari bo‘yicha tushuntirish berib, Rossiyada rahbariyat almashinuvi Vashington pozitsiyasi emasligini ma’lum qilgan.

“Prezident Bayden Putinning boshqaruv vakolatlari, ta’sir doirasi qo‘shni mamlakatlarga o‘tishiga imkon bermaslik kerakligini aytmoqchi bo‘lgan. U Putinning Rossiyadagi boshqaruvini shubha ostiga olmagan va hokimiyat almashinuvini nazarda tutmagan”, – deya Oq uy vakilining so‘zlarida iqtibos keltirgan g‘arb OAV.

Kreml ham Baydenning shov-shuvli bayonotiga javob qaytargan.

“Mazkur bayonot xavotirlarni oshiradi. Biz AQSH prezidentining bu kabi chiqishlarini diqqat bilan kuzatyapmiz. Bu yog‘iga ham qayd etamiz va nima bo‘lishini kuzatamiz”, – degan Rossiya prezidentining matbuot kotibi Dmitriy Peskov.