Ахборот технологиялари ва коммуникацияларини ривожлантириш вазири Шерзод Шерматов Беларуснинг Wargaming компанияси раҳбарияти билан учрашди. Бу ҳақда АКТ вазирлиги матбуот хизмати хабар берди.
Таъкидланишича, учрашув доирасида томонлар ўртасида қатор йўналишлар бўйича ҳамкорлик қилиш масалаларига эътибор қаратилган. Шунингдек, Wargaming компанияси вакиллари Ўзбекистон IТ бозорига катта қизиқиш билдириб, дастурчилар учун ваколатхонасини очиш масалалари муҳокама қилинган.
Ўз навбатида, АКТ вазирлиги раҳбарияти ушбу масалада кўмак беришга тайёрлигини билдирган. Вазирлик вакиллари, IT Park резидентлари бўлган хорижий компанияларга солиқ ва божхона имтиёзлари тақдим этилиши, IT-visa тизими жорий қилингани тўғрисида маълумот берган. Мазкур тизим IТ мутахассис ва унинг оила аъзолари учун визаларни тез олиш имкон беради.
Маълумот учун, Wargaming — бу Беларусь хусусий компанияси ҳисобланиб, компьютер ўйинларини яратиш бўйича жаҳондаги етакчи компаниялардан бири. Компания 15 дан зиёд турли платформаларга мўлжалланган ўйинларни ишлаб чиққан.
Улар орасида World of Tanks ва World of Warplanes компьютер ўйинлари энг оммалашган бўлиб, уларнинг аудиторияси 200 миллион фойдаланувчидан ошади.
Компанияда ҳозирда 5000 дан ортиқ ходим ишлайди. Компаниянинг ваколатхоналари Беларусь, Россия, Украина, Кипр, АҚШ, Франция, Жанубий Корея, Австралия, Сингапур, Япония ва Тайванда жойлашган.
Аввалроқ АКТ вазири Шерзод Шерматов Ўзбекистонга кўчиб ўтмоқчи бўлган IT-компаниялар зарур инфратузилма билан таъминланишини маълум қилганди.
Изоҳ (0)