Davlat xavfsizlik xizmati xodimlari va Chegara qo‘shinlari harbiy xizmatchilari tomonidan giyohvand moddalarning noqonuniy aylanmasiga qarshi kurashish doirasida o‘tkazilgan tezkor-qidiruv tadbirlari natijasida katta miqdordagi gashish moddasi musodara qilindi. Bu haqda DXX axborot xizmati xabar qildi.

Qayd etilishicha, Tojikistonning So‘g‘d viloyati Mastchoh tumanida yashovchi fuqaro (1976-yilda tug‘ilgan) 10 kilogramm 701 gramm gashish giyohvand moddasini kontrabanda yo‘li bilan Toshkent viloyatining Ohangaron tumani hududiga olib o‘tib, xufiyona joyga yashirgan vaqtida qo‘lga olingan.

Tojikistonlik narkosavdogarlar uning kuryerlik xizmatiga 1200 dollar berishi kerak bo‘lgan.

DXXning Qoraqalpog‘iston bo‘yicha boshqarmasi xodimlarining Chegara qo‘shinlari va Bojxona qo‘mitasi bilan hamkorlikda o‘tkazgan tezkor tadbiri davomida Buxoro—Amudaryo yo‘nalishi bo‘yicha harakatlanib kelayotgan Lacetti To‘rtko‘l tumanidagi “Miskin” YPX maskanida to‘xtatilgan. Avtomashina ko‘zdan kechirilganda unda yo‘lovchi sifatida ketayotgan Amudaryo tumanida yashovchi muqaddam giyohvand moddalar savdosi bilan bog‘liq jinoyat sodir etgani uchun sudlangan fuqaro (1968-yilda tug‘ilgan) yonida 2 kilogramm 39 gramm opiy giyohvand moddasi borligi aniqlanib, protsessual tartibda rasmiylashtirib olingan.

Ma’lum bo‘lishicha, giyohvand modda Tojikistondan Buxoro viloyati hududiga kontrabanda yo‘li bilan o‘tkazilgan.

DXXning Sirdaryo viloyati bo‘yicha boshqarmasi, viloyat bojxona boshqarmasi hamda Toshkent shahar ichki ishlar bosh boshqarmasi xodimlari hamkorligida o‘tkazilgan tezkor tadbirda esa Andijon viloyatining Qorasuv shahrida yashovchi fuqaro (1979-yilda tug‘ilgan) boshqaruvidagi Lacetti avtomashinasi poytaxt hududiga kirgan vaqtida to‘xtatilib, ko‘zdan kechirilgan. Natijada uning salon qismida Qirg‘izistondan noqonuniy olib o‘tilgan 11 228 dona “Regapen” va 595 dona “Tropikamid” kuchli ta’sir qiluvchi dori vositalari borligi aniqlanib, tegishli tartibda rasmiylashtirib olingan.

Shuningdek, tezkor tadbir davom ettirilib, uning 1988 va 1991-yillarda tug‘ilgan 2 nafar jinoiy sherigi ham ushlangan.

Bundan tashqari, Toshkent shahri hududida kuzatilgan yana bir shunga o‘xshash holatda Andijon shahrida yashovchi fuqaro (1986-yilda tug‘ilgan) Chilonzor tumanida istiqomat qiluvchi fuqaroga (1987-yilda tug‘ilgan) 5488 dona “Regapen” va 1 188 dona “Tropikamid” dori vositalarini bergan vaqtida ularning har ikkisi ham qo‘lga olingan. Shuningdek, dorilarni qabul qilib olgan shaxsning yashash xonadonida 224 dona “Regapen” dori vositasi borligi aniqlanib, protsessual tartibda rasmiylashtirib olingan.

Tergovga qadar tekshiruv harakatlari davomida ushbu kuchli ta’sir qiluvchi dori vositalarini Qirg‘izistondan mamlakat hududiga kontrabanda yo‘li bilan o‘tkazib, Toshkent shahriga yuborgan Andijon shahrida yashovchi shaxs (1986-yilda tug‘ilgan) ham ushlangan.

O‘tkazilgan tezkor tadbirlar natijasida jami 10 kilogramm 701 gramm gashish, 2 kilogramm 39 gramm opiy giyohvand moddalari hamda 16 940 dona “Regapen” va 1 783 dona “Tropikamid” kuchli ta’sir qiluvchi dori vositalari musodara qilingan.

Hozirda mazkur holatlar bo‘yicha jinoyat ishlari qo‘zg‘atilib, tergov harakatlari olib borilmoqda.